Коста-Рика терма жамоаси бош мураббийи Хорхе Луис Пинто ФИФА рефериси Равшан Эрматовнинг жаҳон чемпионатидаги ҳакамлигини танқид қилди, дея хабар берди UzDaily.
Унинг фикрича, турнир давомида арбитрлар Коста-Рика фойдасига тўрт марта пенальти белгиламаган. Улар Италия, Греция билан бўлган ўйинларда, шунингдек, Равшан Эрматов бошқарган Коста-Рика — Голландия учрашувида ҳам қўлланилмаган. «Сўнгги ўйинда икки марта 11 метрли жарима белгиланиши керак эди. Ҳакамлик яхши олиб борилмади», — деди Пинто.
Мураббий учрашув давомида бошқа кўплаб жиддий хатоликлар бўлганини ҳам айтди ва ФИФА буни ҳал қилишига умид билдирди.
Goal.com сайти таъкидлашича, Эрматов Коста-Риканинг икки футболчисини ўйиндан чиқариб юбориши мумкин эди, бироқ жамоага «раҳм қилди». Шундай бўлса-да, Хорхе Луис Пинто бунга тўхталмади.
Эслатиб ўтамиз, жаҳон чемпионати мусобақасининг чорак финалидан ўрин олган Голландия ҳамда Коста-Рика терма жамоалари ўртасидаги учрашувда европаликлар пенальтилар сериясида ғолиб бўлган эди. Шу ўйин Эрматов бошқарган матчлар сонини рекорд кўрсаткичга етказди.
Изоҳ (0)