Gmail почта хизмати кириллча электрон почта манзилларини ишга туширади

Google корпорацияси вакили Жордин Бюкенен ICANN халқаро корпорациясининг 50-анжуманида Gmail електрон почта манзиллари лотин бўлмаган алифбо, хусусан, кирилл алифбосини ҳам қабул қила олишини айтиб ўтди. «Российская газета» нашрида қайд этилишича, Бюкенен ушбу хизматнинг яқин кунларда ишга тушишини айтган.

Экспертлар фикрича, лотин ҳарфларига асосланмаган алифбонинг тарқалиши электрон қутиси йўқ бўлганлар сонини камайтиради. Google томонидан киритилаётган мазкур хизмат эса бу борада муҳим рол ўйнайди.

Ҳозирги вақтда интернет тармоқларида фақат битта — .рф домени кирилл алифбосида ишлайди. Тез орада ушбу алифбо асосида .москва, .дети ҳамда .рус доменлари ҳам ишга тушиши кутилмоқда.

Эслатиб ўтамиз, бундан аввал электрон қутиларни бошқарувчи ICANN корпорацияси New gTLDs лойиҳаси остида лотин алифбосига асосланмаган юқори савияли 64 доменни ишга туширган. Мазкур лойиҳа туфайли жами 300 дан ортиқ янги доменлар фаолият юритаётган бўлиб, уларда бир миллиондан ортиқ ном рўйхатдан ўтган.