Google korporatsiyasi vakili Jordin Byukenen ICANN xalqaro korporatsiyasining 50-anjumanida Gmail elektron pochta manzillari lotin bo‘lmagan alifbo, xususan, kirill alifbosini ham qabul qila olishini aytib o‘tdi. “Rossiyskaya gazeta” nashrida qayd etilishicha, Byukenen ushbu xizmatning yaqin kunlarda ishga tushishini aytgan.
Ekspertlar fikricha, lotin harflariga asoslanmagan alifboning tarqalishi elektron qutisi yo‘q bo‘lganlar sonini kamaytiradi. Google tomonidan kiritilayotgan mazkur xizmat esa bu borada muhim rol o‘ynaydi.
Hozirgi vaqtda internet tarmoqlarida faqat bitta — .рф domeni kirill alifbosida ishlaydi. Tez orada ushbu alifbo asosida .москва, .дети hamda .рус domenlari ham ishga tushishi kutilmoqda.
Eslatib o‘tamiz, bundan avval elektron qutilarni boshqaruvchi ICANN korporatsiyasi New gTLDs loyihasi ostida lotin alifbosiga asoslanmagan yuqori saviyali 64 domenni ishga tushirgan. Mazkur loyiha tufayli jami 300 dan ortiq yangi domenlar faoliyat yuritayotgan bo‘lib, ularda bir milliondan ortiq nom ro‘yxatdan o‘tgan.
Izoh (0)