Хитойлик ишлаб чиқарувчилар Бразилияда футбол бўйича ўтказилаётган жаҳон чемпионати каби йирик халқаро мусобоқани назардан четда қолдиришни исташмади. Мисол учун, «Таобао» деб номланадиган интернет-дўконда ичимлик идишларининг темир қопқоғини очиш учун мўлжалланган ноёб очқичлар пайдо бўлди дея хабар берди «ИТАР-ТАСС» ахборот агентлиги. Уларнинг ноёблиги шундаки, бу очқичлар Уругвай терма жамоасининг машҳур жанжалкаш тўпурари Луис Суареснинг қиёфасида ишлаб чиқилган.
Барчага маълумки, лотин америкалик бу қаҳрамон Италия терма жамоаси билан бўлган ўйинда рақиб томон ўйинчиси Жоржо Келлинини тишлаб олган. Айнан шу сабаб Суарес терма жамоанинг тўққизта расмий ўйини ва тўрт ой муддатга ҳар қандай футбол фаолияти билан шуғулланишдан четлатилган.
«Шиша идишларни осонлик билан очади» деб таърифланган бу янги маҳсулот 15 юан (2,5 АҚШ доллари)дан 10 минг юан (1606 АҚШ доллари)гача сотилмоқда. Хитойликлар ҳар қандай қизиқ вазиятлардан фойда олиш мумкинлигини амалда кўрсатиб бермоқдалар.
Изоҳ (0)