Бухоро шаҳрида вилоят ҳокимлиги, «Камолот» ёшлар ижтимоий ҳаракати вилоят кенгаши, «Соғлом авлод учун» халқаро хайрия фонди, «Маҳалла» хайрия жамоат фонди ҳудудий бўлимлари ҳамкорлигида «Барча шодлик сенга бўлсин, болажон!» шиори остида ижтимоий акция бўлиб ўтди. Бу ҳақда ЎзА хабар берди.
«Соғлом бола йили» Давлат дастури ижроси доирасида 1 июнь – Халқаро болаларни ҳимоя қилиш куни муносабати билан ташкил этилган тадбир меҳрибонлик уйлари тарбияланувчилари, махсус мактаб-интернатларида таълим олаётган болаларни ҳар томонлама қўллаб-қувватлаш, саломатлигини тиклаш ҳамда ижтимоий кўникмаларини шакллантиришга қаратилганлиги билан аҳамиятлидир.
Тадбирда «Соғлом авлод учун» халқаро хайрия фонди Бухоро вилояти бўлими томонидан бир гуруҳ ногиронларга махсус аравача ва эҳтиёжманд оилалар фарзандлари учун дори-дармон ҳамда гигиеник воситалар топширилди.
Лойиҳа доирасида вилоятдаги «Баркамол авлод» марказлари, мусиқа ва санъат мактаблари, махсус мактаб-интернат ўқувчиларининг ижодий ишлари кўргазмаси, расмлар танлови ўтказилди. «Эртаклар оламига саёҳат», «Соғлом бола», «Қувончингдан янграсин олам!», «Сеҳрли бармоқчалар» каби тадбирларда болажонлар эртак «қаҳрамонлари» билан бирга ўйнади.
— Вилоят қўғирчоқ театри томонидан намойиш этилган қизиқарли саҳна кўринишлари, дорбозларнинг чиқиши бизга жуда ёқди, — дейди 32-Меҳрибонлик уйи тарбияланувчиси Бобомурод Муродов.
Изоҳ (0)