Buxoroda 1-iyunga bag‘ishlangan ijtimoiy aksiya o‘tkazildi

Buxoro shahrida viloyat hokimligi, “Kamolot” yoshlar ijtimoiy harakati viloyat kengashi, “Sog‘lom avlod uchun” xalqaro xayriya fondi, “Mahalla” xayriya jamoat fondi hududiy bo‘limlari hamkorligida “Barcha shodlik senga bo‘lsin, bolajon!” shiori ostida ijtimoiy aksiya bo‘lib o‘tdi. Bu haqda O‘zA xabar berdi.

“Sog‘lom bola yili” Davlat dasturi ijrosi doirasida 1-iyun – Xalqaro bolalarni himoya qilish kuni munosabati bilan tashkil etilgan tadbir mehribonlik uylari tarbiyalanuvchilari, maxsus maktab-internatlarida ta’lim olayotgan bolalarni har tomonlama qo‘llab-quvvatlash, salomatligini tiklash hamda ijtimoiy ko‘nikmalarini shakllantirishga qaratilganligi bilan ahamiyatlidir.

Tadbirda “Sog‘lom avlod uchun” xalqaro xayriya fondi Buxoro viloyati bo‘limi tomonidan bir guruh nogironlarga maxsus aravacha va ehtiyojmand oilalar farzandlari uchun dori-darmon hamda gigiyenik vositalar topshirildi.

Loyiha doirasida viloyatdagi “Barkamol avlod” markazlari, musiqa va san’at maktablari, maxsus maktab-internat o‘quvchilarining ijodiy ishlari ko‘rgazmasi, rasmlar tanlovi o‘tkazildi. “Ertaklar olamiga sayohat”, “Sog‘lom bola”, “Quvonchingdan yangrasin olam!”, “Sehrli barmoqchalar” kabi tadbirlarda bolajonlar ertak “qahramonlari” bilan birga o‘ynadi.

— Viloyat qo‘g‘irchoq teatri tomonidan namoyish etilgan qiziqarli sahna ko‘rinishlari, dorbozlarning chiqishi bizga juda yoqdi, — deydi 32-Mehribonlik uyi tarbiyalanuvchisi Bobomurod Murodov.