АҚШ Ҳарбий денгиз кучларининг «Доналд Кук» ракетали крейсери яқин бир неча кун ичида Қора денгиз акваториясида навбатчилик қилишга киришади. Бу ҳақда Болгария оммавий ахборот воситаларига таяниб «ИТАР-ТАСС» хабар берган.
Болгария Мудофаа вазирлигидаги манбаларнинг хабар беришларича, америкалик денгизчилар ва уларнинг ҳудуддаги иттифоқчилари ҳамкорликда ўқув машқлари ўтказишни режалаштирилган. Шунингдек, АҚШ кемаси Қора денгиз соҳилларидаги, жумладан, Болгариядаги бир нечта портларга кириб чиқади. Қўшимча тарзда Руминияга тегишли соҳилларда АҚШнинг 175 нафар денгиз пиёдалари жойлаштирилади.
АҚШ мудофаа вазирининг халқаро хавфсизлик ишлари бўйича ёрдамчиси Дерек Чоллет Конгресс вакиллар палатасининг Қуролли кучлар ишлари бўйича қўмита йиғилишида бу тўғрида баёнот берган. Унга кўра, ҳозирда Қора денгизда навбатчилик қилаётган «Тракстан» эсминецига қўшимча тарзда Ҳарбий денгиз кучларининг яна бир кемаси бир ҳафта ичида шу ҳудудга жўнатилади.
Шу билан бирга, Чоллетнинг таъкидлашича, Россиянинг яқиндаги ҳаракатлари билан боғлиқ тарзда АҚШ Қуролли кучларининг бюджети қайта кўриб чиқилмаган. «Бу ҳужжатнинг асосий стратегияси ўзгаришсиз қолади. Биз инқирозгача машғул бўлган вазифалар келажакда ҳам ўзгартирилмайди», – дейди Пентагон вакили.
Изоҳ (0)