Қирғизистон собиқ президенти Қурманбек Бакиев Буюк Британия фуқароси Шон Дейлига суиқасд ташкил қилишда айбланиб 25 йилга озодликдан маҳкум қилинди. Бу ҳақда «ИТАР-ТАСС» хабар берди.
Шунингдек, собиқ президентнинг укаси Жонибек Бакиевга бу иш бўйича мол-мулки мусодара қилинган ҳолда умрбод қамоқ жазоси тайинланди. Собиқ Давлат раҳбарининг катта ўғли Марат Бакиев 20 йиллик колонияга, кичик ўғли Максим Бакиев умрбод қамоқ жазосига маҳкум этилди. Ҳар иккисининг ҳам мол-мулки мусодара қилинди.
Терговлар натижасида 2005 йилда Бакиевлар оиласи Қирғизистоннинг Талас вилоятидаги Жеруй олтин конини қўлга киритишга қарор қилгани маълум бўлди. Ўша вақтда кон Oxus Gold компаниясига тегишли бўлган. Унинг раҳбари — Британия фуқароси Дейлини четлатиш мақсадида Бакиевлар оиласи унга 5,6 калибрли тўппончадан олти марта ўқ узишган. Бироқ вақтида кўрсатилган тиббий ёрдам туфайли хориж фуқароси тирик қолган.
Қурманбек Бакиев 2005–2010 йилларда президентлик қилган. 2010 йил апрель воқеаларида қўзғолончилар ва ҳукумат кучлари ўртасидаги тўқнашувларда 70 дан ортиқ киши ҳалок бўлган. Тўнтаришдан кейин президент Александр Лукашенко таклифи билан Белоруссияга кетган. Қирғизистон ҳукумати тепасига келган рақиблари Бакиевни топширишни талаб этишган, аммо Белоруссия уни Қирғизистонга топширишдан бош тортган.
Изоҳ (0)