Япониялик олимлар дунёда биринчи ҳаво дисплейини яратишди. Унда қўлланган технология инсонни сенсор қурилмалар заруратидан озод этади, дея хабар беради Reuters.
Токио университети профессори Масатоси Исикава бу ҳақда шундай дейди: «Биз яратган дисплейнинг аввалги технологиялардан асосий фарқи – кўриш бурчагининг анча катталигидир. Бундан ташқари, биз интерфейснинг имо-ишораларни англаб олиш тизимини сезиларли даражада яхшиладик».
Ҳаво экрани – шундоққина ҳавонинг ўзида тасвир намоён бўлишидир. Бунга светодиодли махсус кўзгудан қайтадиган ёруғлик ёрдамида эришилди. Ҳаво дисплейида ҳосил бўладиган тасвир ҳар қандай бурчакдан ҳам яхши кўринади. Сониясига юзлаб кадрларни суратга олувчи стереокамералар ёрдамида бу интерфейс имо-ишораларни тез илғаб олади.
«Уни бошқариш учун қўлингизда бирон нима бўлиши шарт эмас, – дейди профессор Исикава. – Шунчаки хонага кирасиз ва муайян имо-ишора билан кўз олдингизда ҳавода пайдо бўладиган, масалан, компьютер ўйинини ишга туширасиз».
Олимларнинг фикрича, бундай технологияга жамият ҳаётининг кўплаб соҳаларида талаб бўлади – жарроҳликдан тортиб ўйин индустриясигача ундан фойдаланиш мумкин. Ихтирочилар ҳаво дисплейини жорий йилнинг охирида кенг оммага намойиш этишмоқчи, 2015-йили эса уларни серияли тарзда ишлаб чиқариш бошланади.
Изоҳ (0)