“Sardor” 25 yoshda: serial qahramonlari o‘tgan vaqt ichida qanchalik o‘zgargan?

Suratga olinganiga 25 yil bo‘lishiga qaramasdan, “Sardor” seriali hozirgacha vatanparvarlik ruhidagi seriallar ichida millionlab insonlarning sevimli filmi bo‘lib qolmoqda. Serial 2000-yilda rejissor Shavkat Mahbubov tomonidan suratga olingan bo‘lib, unda bosh rollarni Ulug‘bek Yunusov, Shomahmud Shorasulov, Bobur Yo‘ldoshev, Jamshid Arslonov, Nigora Karimboyeva, O‘tkir Mengliyev, Durdona Tursunboyeva, Yoqub Ahmedov, Karim Mirhodiyev, Mahmud Ismoilov, Fotih Jalolov singari aktyor va aktrisalar ijro etishgan

“Generalning jiyani” kursant Zafar Davlatnazarov rolini mahorat bilan ijro etgan Bobur Yo‘ldoshev serialni suratga olish jarayonida 21 yoshda bo‘lgan.

“Sardor” serialidan so‘ng birin-ketin “Dev bilan pakana”, “Osmondagi bolalar 2”, “Sevinch”, “Vatan”, “Zabarjad”, “Omad”, “Qo‘rg‘oshin”, “Tog‘a” kabi filmlarda bosh rollarni ijro etgan.

Aktyor bugungi kunda “Diydor” yoshlar teatri rahbari sifatida faoliyatini davom ettirmoqda.

“Sardor” serialida serjant Zamira rolini ijro etgan aktrisa Nigora Karimboyeva o‘sha vaqtda 21 yoshda bo‘lgan. Ushbu serialdagi ijro aktrisaning ilk rollaridan biri hisoblanadi.

Aktrisa hozirgi kunga qadar “Alvido”, “Vatan”, “Chashma”, “Osmon yaqin”, “Dada”, “Sabot”, “Tog‘a” kabi filmlarda turli darajadagi rollarni ijro etgan.

Nigora Karimboyeva bugungi kunda “Ilhom” teatrida aktrisa, shuningdek, telekanalda boshlovchi sifatida faoliyatini davom ettirmoqda.

Aktyor Ulug‘bek Yunusov “Sardor” serialida kursant O‘ktam rolini ijro etgan. “Sardor” seriali aktyorning ilk rollaridan biri hisoblanadi.

“Sardor” serialidan tashqari “Qaytar dunyo” serialidagi Abdulla roli bilan ham aktyor muxlislar orasida mashhurlikka erishgan.

Asli kasbi rejissyor bo‘lgan, filmlarda rol ijro etishni xushlamaydigan Ulug‘bek Yunusov “Muhabbat sinovlari”, “Sarvinoz”, “Fotima va Zuhra”, “Jasur”, “Begonalar”, “Muqaddas burch” kabi filmlarda turli darajadagi rollarni ijro etgan.

Aktyor va rejissyor Ulug‘bek Yunusov bugungi kunda tadbirkorlik bilan shug‘ullanmoqda.

“Sardor” serialida kursant Ismoil Qudratov rolini ijro etgan Shomahmud Shorasulov 31 yoshda bo‘lgan.

Hozirgi kunda dublyaj rejissyori bo‘lib ishlayotgan Shomahmud Shorasulov intervyularida “Sardor”dagi rolining katta qismi kesib tashlanganini va shundan so‘ng filmlarda rol ijro etmaganini ma’lum qilgan edi.

Shomahmud Shorasulov moddiy qiyinchiliklar sabab Isroil davlatida 10 oy davomida ofitsiantlik qilgan.

Shomahmud Shorasulov “Saroy javohiri”, “Yoz ifori” (Koreya), “Ikki taqdir” (Hindiston), “Oila rishtalari” (Turkiya), “Telba”, “Jinoyat va jazo”, “O‘smir” (Dostoyevskiy asarlari asosida. Rossiya) “Urush va tinchlik” (BBC) kabi seriallarga, “Vanya tog‘a”, “Jamila” (Rossiya) “Iltijo”, “Tazarru”, “Orzu daraxti” (Gruziya) “Samoviy yog‘du”, “Yomg‘ir”, “Tilla baliqcha”, “Chumchuq qo‘shig‘i” (Eron) “Yovvoyi nok” (Turkiya) “Qo‘rqoq”, “Apu trilogiyasi”, “Qizil qalampir” (Hindiston), “Yo‘l”, “Qizil sahro” (Italiya), “Rasyomon”, “Qumlikdagi ayol” (Yaponiya) kabi badiiy filmlarni ovozlashtirish jarayoniga rejissyorlik qilgan.

O‘zbekistonda xizmat ko‘rsatgan artist Hoshim Arslonovning to‘ng‘ich farzandi Jamshid Arslonovni kino ixlosmandlari avvalo Hoshim Arslonovning o‘g‘li emas, balki “Sardor” serialidagi janjalkash kursant Botir Roziqov roli bilan tanishadi.

Jamshid Arslonov “Sardor” serialida 22 yoshida suratga tushgan. “Zanjir”, “Chempionlik orzusi” seriallari hamda “Otamdan qolgan dalalar” filmida turli darajadagi rollarni ijro etgan.

Jamshid Arslonov bugungi kunda tadbirkorlik bilan shug‘ullanadi.

Faoliyatini 1998-yilda “Shaytanat” serialida epizod roldan boshlagan aktrisa Durdona Tursunboyeva 2000-yilda “Sardor” serialida serjant rolini ijro etgan.

Aktrisa bugungi kunda AQSHda yashab, tadbirkorlik bilan shug‘ullanadi.

Aktyor O‘tkir Mengliyev “Sardor” serialida “starshina” Eshjonov rolini ijro etgan. Aktyor o‘shanda 23 yoshda bo‘lgan.

O‘tkir Mengliyev “Sardor”dagi ilk rolidan so‘ng “Kichkina odamlar”, “Tavba”, “Advokatlar”, “Dada”, “Zirapcha”, “Akajon, xizmatingizdamiz”, “Taqdirlar” kabi bir qancha filmlarda turli darajadagi rollarni ijro etgan.

O‘tkir Mengliyev bugungi kunda O‘zbek milliy akademik drama teatri aktyori sifatida faoliyatini davom ettirmoqda.

O‘zbekistonda xizmat ko‘rsatgan artist Noila Toshkenboyeva serialda Dilorom opa obrazini gavdalantirgan. O‘shanda u 56 yoshda edi. U bugungi kunda ham faol ijod bilan mashg‘ul, aktrisa film va seriallarda rollar ijro etish bilan birgalikda, dublyajda ham samarali faoliyat yuritmoqda. 

Noila Toshkenboyeva faoliyati davomida “Shum bola”, “Suyunchi”, “To‘ylar muborak”, “Kelinlar qo‘zg‘oloni” kabi bir qancha filmlarda rollar ijro etgan. Aktrisa dublyajdagi faoliyati mobaynida mingdan ortiq badiiy filmlar, multfilmlar va seriallarga ovoz bergan. Ayniqsa, ovoz bergan filmlaridan “Esmeralda”, “Ayol”, “Parchalangan yuraklar”, “Zolim Istanbul” singari seriallardagi dublyaj ishlari alohida ahamiyatga ega.

O‘zbekistonda xizmat ko‘rsatgan artist Jalol Yusupov “Sardor”da suratga tushganida 30 yoshda edi. 

Jalol Yusupov “Sardor”dan so‘ng “Bir kam dunyo”, “Zanjir” seriallarida, “Dard”, “Arosat”, “Aldangan ayol”, “Matonat” kabi filmlarda turli obrazlarni gavdalantirgan. 

Uchqun Tillayev serialda vzvod komandiri obrazini gavdalantirgan. O‘shanda u 26 yoshda edi. 

Uchqun Tillayev bugungi kunda Ichki ishlar vazirligining ansamblida faoliyat yuritadi. Podpolkovnik Uchqun Tillayev 2014-yildan buyon ansamblning madaniyat saroyi rahbari hisoblanadi.

Aktyor suratga tushgan filmlar orasida “Ostona”, “Jazo”, “Egizaklar”, “Poyqadam” hamda “Poyga” filmlari mashhur. 

Rejissyor va ssenarist Hilol Nasimov serialda suratga tushgan paytda 37 yoshda edi. 

Hilol Nasimov “Aldangan ayol”, “Merosxo‘r”, “Tubanlik” kabi filmlari bilan tomoshabinlarga yaxshi tanish. Rejissyor bugungi kunda ijoddan tashqari, yosh kadrlarga dars berib kelmoqda. 

O‘zbekistonda xizmat ko‘rsatgan artist Karim Mirhodiyev serialda suratga tushganida 35 yoshda edi. 

Karim Mirhodiyevning ijodida bugungi kunda tanaffus kuzatilmoqda. Tomoshabinlar uning “Charxpalak”, “Kichkina tabib”, “Osmon yaqin”, “Qo‘rg‘oshin”, “Kechikkan hayot”, “Hamroh” kabi filmlaridagi obrazlari bilan yaxshi tanishadi. 

Gulchehra Nosirova serialda suratga tushganida 36 yoshda edi. 

Aktrisa bugungi kunda “Muqimiy” nomidagi musiqali drama teatrida faoliyat yuritmoqda. Aktrisa “Super kelinchak”, “Xavfli burilish”, “Opa-singillar”, “Sehrli qalpoqcha”, “Ayol qasosi” kabi film va seriallarda ham rollar ijro etgan. 

O‘zbekistonda xizmat ko‘rsatgan artist Mahmud Ismoilov serialda suratga tushganida 35 yoshda edi.  

Mahmud Ismoilov bugun ham faol ijod bilan band. Uning “Sevgi fazosi”, “Qaytar dunyo”, “Shaytanat”, “Opa-singillar”, “Bevalar” va “Muqaddas burch” kabi loyihalardagi obrazlari tomoshabinlar qalbidan munosib joy egallagan. 

Serialda generel obrazini mahorat bilan ijro etgan O‘zbekiston xalq artisti Yoqub Ahmedov hozirda tabarruk 87 yoshda. U ayni paytda farzandlari va nevaralari davrasida umrguzaronlik qilmoqda. 

Yoqub Ahmedov Otello, Yusufbek hoji, Kreonat, Shohjahon, Karenin singari rollari bilan o‘zbek teatri tarixida munosib iz qoldirgan, sahnada Abu Rayhon Beruniy, Ali Qushchi, Alisher Navoiy, Zahiriddin Muhammad Bobur, Zokirjon Xolmuhammad o‘g‘li Furqat, Abay kabi tarixiy siymolarni gavdalantirib, shon-shuhrat qozongan o‘zbek kinosining tirik afsonasi. Uning filmografiyasidan 100 ga yaqin muvaffaqiyatli loyihalar o‘rin olgan.