“Daryo”da Oliy sudning Iqtisodiy ishlar bo‘yicha sudlov hay’ati sud boshlanishidan avval prokuror bilan yashirin suhbat qurgani, 15 daqiqacha davom etgan suhbat taraflarni tashqarida qoldirgan holda amalga oshirilgani uchun javobgar va uning advokati e’tiroziga sabab bo‘lgani xabar berilgandi. Shundan so‘ng da’vogarning advokati sudlov hay’atidan harakati uchun izoh so‘ragani, shuningdek, Oliy sud raisiga ham shikoyat qilgani ochiqlandi. Sudlov hay’atining 3-dekabr kuni davom etgan navbatdagi majlisida da’vogar fermer advokati yana sudlov hay’atiga yuzlanib, prokuror bilan “pichir-pichir”ga aniqlik kiritishini talab qildi. Bu haqda sudda qatnashgan “Daryo” jurnalisti ma’lum qildi.
Hurmatli raislik etuvchi, sudlov hay’ati sud majlisidan oldin prokuror bilan 10-15 daqiqa yashirin gaplashilganiga izoh talab qilaman, shundan so‘ng advokat sifatida so‘zlarimni davom ettiraman, dedi fermerning advokati.
Sudlov hay’ati raisi mazkur talabga javob qaytarar ekan, da’vogar nomidan bu haqda Oliy sud raisiga ham yozma ariza qilinganini eslatib, ayni paytda izoh bermasligini, advokat so‘roviga yozma javob qaytarilishini bildirdi.
Iqtisodiy protsessual kodeksda, “Sudlar to‘g‘risi”dagi qonunda aynan Siz talab qilgandek izoh berish hech qayerda keltirib o‘tilmagan. Sizning arizangizga batafsil yozma javob berilishini ma’lum qilamiz, dedi sudlov hay’ati raisi Rustamov.
Advokat esa sud majlisida ham bunga og‘zaki so‘rov berishga va javobini eshitishga haqli ekanini ta’kidladi.
Izoh yo‘q demoqchimisiz, izoh berish imkoni bo‘lmasa, imkoni yo‘q deb ayting. Demak, izoh yo‘q, dedi advokat.
Sudyalar oliy kengashining 2024-yil 15-maydagi 1903-son qarori bilan tasdiqlangan “Sudyalar odobi kodeksi”ning 2-moddasida sudyaning xulq-atvoriga doir umumiy talablar haqida so‘z borib, “Sudya odob va axloqning umume’tirof etilgan qoidalariga amal qilishi, har qanday vaziyatda haqiqatparvar bo‘lishi, sud hokimiyatining nufuzini tushiradigan va sudyaning obro‘-e’tiboriga putur yetkazadigan yoki uning xolisligi, mustaqilligi va beg‘arazligiga shubha tug‘dirishi mumkin bo‘lgan xatti-harakatlardan o‘zini tiyishi shart”, deyilgan.
Qashqadaryo viloyatining Nishon tumanida faoliyat yurituvchi fermer MIBning tuman bo‘limidan haydov traktorini 49 kun noqonuniy tarzda ushlab turib, fermerning mavsumda daromad olishiga to‘sqinlik qilgani uchun 355 million so‘m boy berilgan zararni undirishga kirishgan. Mazkur ishni ko‘rib chiqqan quyi instansiya — Qarshi tumanlararo iqtisodiy sudi 2024-yil 5-fevraldagi hal qiluv qarori bilan fermer iddaosini haqli deb topdi va MIBning Nishon tuman bo‘limidan fermer xo‘jaligi foydasiga 355 million so‘m kompensatsiya undirish kerak degan to‘xtamga keldi. Keyinchalik yuqori turuvchi instansiya — Qashqadaryo viloyat sudining iqtisodiy ishlar bo‘yicha sudlov hay’ati apellyatsiya instansiyasi mazkur qarorni bekor qilib, fermerning da’vo talabini rad etgan.
Izoh (0)