“Дарё”да Олий суднинг Иқтисодий ишлар бўйича судлов ҳайъати суд бошланишидан аввал прокурор билан яширин суҳбат қургани, 15 дақиқача давом этган суҳбат тарафларни ташқарида қолдирган ҳолда амалга оширилгани учун жавобгар ва унинг адвокати эътирозига сабаб бўлгани хабар берилганди. Шундан сўнг даъвогарнинг адвокати судлов ҳайъатидан ҳаракати учун изоҳ сўрагани, шунингдек, Олий суд раисига ҳам шикоят қилгани очиқланди. Судлов ҳайъатининг 3 декабрь куни давом этган навбатдаги мажлисида даъвогар фермер адвокати яна судлов ҳайъатига юзланиб, прокурор билан “пичир-пичир”га аниқлик киритишини талаб қилди. Бу ҳақда судда қатнашган “Дарё” журналисти маълум қилди.
Ҳурматли раислик этувчи, судлов ҳайъати суд мажлисидан олдин прокурор билан 10-15 дақиқа яширин гаплашилганига изоҳ талаб қиламан, шундан сўнг адвокат сифатида сўзларимни давом эттираман, деди фермернинг адвокати.
Судлов ҳайъати раиси мазкур талабга жавоб қайтарар экан, даъвогар номидан бу ҳақда Олий суд раисига ҳам ёзма ариза қилинганини эслатиб, айни пайтда изоҳ бермаслигини, адвокат сўровига ёзма жавоб қайтарилишини билдирди.
Иқтисодий процессуал кодексда, “Судлар тўғриси”даги қонунда айнан Сиз талаб қилгандек изоҳ бериш ҳеч қаерда келтириб ўтилмаган. Сизнинг аризангизга батафсил ёзма жавоб берилишини маълум қиламиз, деди судлов ҳайъати раиси Рустамов.
Адвокат эса суд мажлисида ҳам бунга оғзаки сўров беришга ва жавобини эшитишга ҳақли эканини таъкидлади.
Изоҳ йўқ демоқчимисиз, изоҳ бериш имкони бўлмаса, имкони йўқ деб айтинг. Демак, изоҳ йўқ, деди адвокат.
Судьялар олий кенгашининг 2024 йил 15 майдаги 1903-сон қарори билан тасдиқланган “Судьялар одоби кодекси”нинг 2-моддасида судьянинг хулқ-атворига доир умумий талаблар ҳақида сўз бориб, “Судья одоб ва ахлоқнинг умумеътироф этилган қоидаларига амал қилиши, ҳар қандай вазиятда ҳақиқатпарвар бўлиши, суд ҳокимиятининг нуфузини туширадиган ва судьянинг обрў-эътиборига путур етказадиган ёки унинг холислиги, мустақиллиги ва беғаразлигига шубҳа туғдириши мумкин бўлган хатти-ҳаракатлардан ўзини тийиши шарт”, дейилган.
Қашқадарё вилоятининг Нишон туманида фаолият юритувчи фермер МИБнинг туман бўлимидан ҳайдов тракторини 49 кун ноқонуний тарзда ушлаб туриб, фермернинг мавсумда даромад олишига тўсқинлик қилгани учун 355 миллион сўм бой берилган зарарни ундиришга киришган. Мазкур ишни кўриб чиққан қуйи инстанция — Қарши туманлараро иқтисодий суди 2024 йил 5 февралдаги ҳал қилув қарори билан фермер иддаосини ҳақли деб топди ва МИБнинг Нишон туман бўлимидан фермер хўжалиги фойдасига 355 миллион сўм компенсация ундириш керак деган тўхтамга келди. Кейинчалик юқори турувчи инстанция — Қашқадарё вилоят судининг иқтисодий ишлар бўйича судлов ҳайъати апелляция инстанцияси мазкур қарорни бекор қилиб, фермернинг даъво талабини рад этган.
Изоҳ (0)