Rossiyada 11,8 million kishi yashash minimumidan past daromad bilan hayot kechirmoqda. 2024-yilning uchinchi choragida bu ko‘rsatkich oyiga 15 ming 679 rublni (salkam 2 million so‘m) tashkil etadi. “Rosstat” tegishli ma’lumotni e’lon qildi.
Qashshoqlikning bazaviy chegarasi 2020-yilning to‘rtinchi choragida 11 329 rubl darajasida edi. 2024-yilda bu qiymat 15 679 rublni tashkil etdi. Kambag‘allik darajasi 2023-yilga nisbatan 9,4 foizdan 8 foizgacha pasaygan.
2024-yil yanvar-sentyabr oylari davomida kambag‘allik chegarasidan past pul daromadiga ega bo‘lganlar soni o‘tgan yilning mos davriga nisbatan 2 million kishiga kamaygan.
“Rosstat” kambag‘allar sonini pasaytirib ko‘rsatmoqdami?
2021-yilda “Rosstat” prezident Vladimir Putinning kambag‘allik darajasini pasaytirish bo‘yicha farmonini bajarish uchun hisob-kitob metodikasini o‘zgartirgan. Endi kambag‘allik chegarasi 2020-yilning to‘rtinchi choragidagi minimal oziq-ovqat savati qiymatini o‘sha paytdan beri to‘plangan inflyatsiyaga ko‘paytirish orqali baholanadi. Biroq The Insider ta’kidlashicha, inflyatsiya kam ta’minlangan aholi odatda iste’mol qilmaydigan yuzlab tovarlar va xizmatlar narxlari bo‘yicha hisoblanadi.
Shunday qilib, qashshoqlik chegarasini hisoblashda yashab qolish uchun zarur bo‘lgan daromad dastlab formulalarni manipulyatsiya qilish orqali sun’iy ravishda pasaytirilgan. The Insider hisob-kitoblariga ko‘ra, agar oldingi uslubdan foydalanilsa, 2023-yil yakuniga asosan Rossiyada hukumat tan olganidan bir yarim barobar ko‘proq kambag‘allar borligi ma’lum bo‘ladi, ya’ni 14,6 milliondan 18 million kishigacha.
Izoh (0)