Россияда 11,8 миллион киши яшаш минимумидан паст даромад билан ҳаёт кечирмоқда. 2024 йилнинг учинчи чорагида бу кўрсаткич ойига 15 минг 679 рублни (салкам 2 миллион сўм) ташкил этади. “Росстат” тегишли маълумотни эълон қилди.
Қашшоқликнинг базавий чегараси 2020 йилнинг тўртинчи чорагида 11 329 рубль даражасида эди. 2024 йилда бу қиймат 15 679 рублни ташкил этди. Камбағаллик даражаси 2023 йилга нисбатан 9,4 фоиздан 8 фоизгача пасайган.
2024 йил январь сентябрь ойлари давомида камбағаллик чегарасидан паст пул даромадига эга бўлганлар сони ўтган йилнинг мос даврига нисбатан 2 миллион кишига камайган.
“Росстат” камбағаллар сонини пасайтириб кўрсатмоқдами?
2021 йилда “Росстат” президент Владимир Путиннинг камбағаллик даражасини пасайтириш бўйича фармонини бажариш учун ҳисоб-китоб методикасини ўзгартирган. Энди камбағаллик чегараси 2020 йилнинг тўртинчи чорагидаги минимал озиқ-овқат савати қийматини ўша пайтдан бери тўпланган инфляцияга кўпайтириш орқали баҳоланади. Бироқ Тhе Insider таъкидлашича, инфляция кам таъминланган аҳоли одатда истеъмол қилмайдиган юзлаб товарлар ва хизматлар нархлари бўйича ҳисобланади.
Шундай қилиб, қашшоқлик чегарасини ҳисоблашда яшаб қолиш учун зарур бўлган даромад дастлаб формулаларни манипуляция қилиш орқали сунъий равишда пасайтирилган. Тhе Insider ҳисоб-китобларига кўра, агар олдинги услубдан фойдаланилса, 2023 йил якунига асосан Россияда ҳукумат тан олганидан бир ярим баробар кўпроқ камбағаллар борлиги маълум бўлади, яъни 14,6 миллиондан 18 миллион кишигача.
Изоҳ (0)