“2025-yil uchun O‘zbekiston Respublikasining davlat byudjeti to‘g‘risida”gi qonun 24-dekabr kuni qabul qilindi.
Unga ko‘ra, O‘zbekiston milliy teleradiokompaniyasiga 881 milliard so‘mdan ortiq mablag‘ ajratilgan. Shundan 107 milliard so‘mdan ko‘proq mablag‘ futbol musobaqalarini yoritishga moslashgan ko‘chma televizion stansiyalar sotib olish uchun ajratiladi.
Bundan tashqari, “O‘zbekiston 24” va “Mahalla” teleradiokanallarini respublika hududida efirga uzatishni to‘liq HD formatga o‘tkazish xarajatlari uchun qarib 20 milliard, obyektlarni loyihalashtirish, qurish va jihozlash uchun 15 milliard ajratilgan.
Ma’lumot uchun, 2024-yil uchun MTRKga davlat byudjetidan 559,9 mlrd so‘m, 2023-yilda 555,94 mlrd so‘m mablag‘ ajratilgan.
2025-yilning 1-yanvaridan O‘zbekistonda “Futbol TV” nomi ostida futbol musobaqalarini yoritishga moslashgan kanal faoliyatini boshlaydi.
Jurnalist Davron Fayziyevning xabar berishicha, kanal hozirda faoliyat olib borayotgan “Foreign Languages” kanali to‘lqinida tashkil etiladi.
Bungacha 2017-yildan 2022-yilga qadar “UzReport” telekanali qoshida “Futbol TV” (xususiy telekanal) faoliyat olib borgandi. 2022-yilda hech qaysi chempionat translyatsiyasini sotib olmagan kanal yopilib, uning o‘rnida ko‘ngilochar kanal tashkil etilgandi.
2024-yil fevral oyida Abdurashid Jo‘raboyev O‘zbekiston Milliy teleradiokompaniyasiga rais etib tayinlandi. Bungacha u bosh vazir kotibiyati rahbari lavozimida ishlab kelgan.
Izoh (0)