O‘zbekiston Milliy teleradiokompaniyasiga yangi rahbar tayinlandi

Milliy teleradiokompaniya (MTRK) raisi Alisher Xo‘jayev lavozimidan ozod etilib, o‘rniga Abdurashid Jo‘raboyev tayinlandi. Bu haqda O‘zA xabar berdi.

Alisher Xo‘jayev 2005-yilning 15-aprel kuni O‘zbekiston Teleradiokompaniyasi raisi etib tayinlangan edi. 2017-yilning fevralida lavozimidan olinib, o‘rniga Xurshid Mirzohidov O‘zbekiston Milliy teleradiokompaniyasi rahbar bo‘lgandi.

O‘sha yilning 3-avgustida Xurshid Mirzohidov lavozimidan ozod etilib, Bobur Alixonov O‘zMTRK raisi vazifasini bajaruvchi etib tayinlandi. 30-avgust kuni Alisher Xo‘jayev yana O‘zMTRK rahbariga aylandi. 

Ushbu lavozimda bir muddat ishlagach, Vazirlar Mahkamasi huzuridagi millatlararo munosabatlar va xorijiy mamlakatlar bilan do‘stona munosabatlar bo‘yicha qo‘mita raisi o‘rinbosarligiga o‘tdi. 2020-yilning mart oyida Alisher Xo‘jayev yana MTRK raisi etib tayinlandi.

Milliy teleradiokompaniyaga yangi rais etib tayinlangan Abdurashid Jo‘raboyev bunga qadar bosh vazir kotibiyati rahbari edi.