Turkiyaning “Fenerbahche” klubi bosh murabbiyi Joze Mourinyo faoliyatini terma jamoada davom ettirish istagini bildirdi. Bu haqda Sport-Express nashri xabar berdi.
Unga ko‘ra, portugaliyalik mutaxassis aynan o‘z vatanining jamoasi bilan Jahon chempionatida ishtirok etishni orzu qilayotganini ta’kidladi:
Men Jahon chempionatida ishtirok etishni istayman — bu Portugaliya bilan bo‘ladimi yoki boshqa mamlakat bilanmi, hozircha noma’lum. Ammo bu Portugaliya bo‘lishi kerak, deb o‘ylayman. O‘zimni federatsiyaga taklif qilmayapman, hammasi tabiiy yo‘l bilan bo‘lishi kerak. Ishonamanki, bir kun bu sodir bo‘ladi, — dedi Mourinyo Canal 11 telekanaliga bergan intervyusida.
Qayd etish joizki, 2030-yilgi Jahon chempionati aynan Mourinyo vatani Portugaliya, shuningdek, Ispaniya va Marokashda o‘tkaziladi. Musobaqa 13-iyundan 21-iyulgacha davom etadi. Shuningdek, turnir doirasida Urugvay, Argentina va Paragvay mezbonlik qiladigan uchta bahs ham belgilangan.
Eslatib o‘tamiz, hozirda Portugaliya terma jamoasini 52 yoshli ispaniyalik mutaxassis Roberto Martines boshqarmoqda.
Ma’lumot uchun, Joze Mourinyo murabbiylik faoliyati davomida “Portu”, “Chelsi”, “Inter”, “Real Madrid”, “Manchester Yunayted”, “Tottenhem” va “Roma” kabi klublarni boshqargan va ular bilan ko‘plab sovrinlarga ega chiqqan.
Izoh (0)