Suriya hukumati mamlakat janubida joylashgan Suvayda shahri uchun janglar yakunlanganini ma’lum qildi. Druzlar va badaviy qabilalar o‘rtasidagi nizo sabab hudud qonli to‘qnashuvlar markaziga aylangan edi. Taxminan bir hafta oldin boshlangan mojaro mingga yaqin suriyalikning hayotiga nuqta qo‘ydi.
Manbalarga ko‘ra, druzlarga qarshi jang qilayotgan qurolli guruhlar 19-iyul kuni shaharni tashlab chiqqan. Bunga Damashq va Tel-Aviv AQSH vositachiligida erishgan sulh sabab bo‘lgan. Suriya Ichki ishlar vazirligi vakili Nuredin al-Baba o‘zining Telegram kanali orqali bayonot berib, “shahar badaviy jangchilardan tozalangani va mahallalarda to‘qnashuvlar to‘xtatilgani”ni ma’lum qildi.
Isroilning havo hujumlari
Yahudiy davlati druz ozchiliklarni himoyalash bahonasi bilan Suriya mudofaa hamda ichki ishlar vazirligining Suvayda hududidagi kuchlariga zarba berdi. Bundan tashqari, Damashqdagi prezident saroyi va qurolli kuchlar Bosh shtabini ham nishonga oldi. Bu hukumatni hududdan o‘z askarlarini olib chiqishga majbur qildi. Shundan so‘ng, uzoqqa cho‘zilmagan sulh imzolandi.
Oq uy vositachiligidagi kelishuv
Qo‘shma Shtatlar elchisi Tom Barrakning so‘zlariga ko‘ra, Suriya prezidenti Ahmad ash-Shara’a va Isroil bosh vaziri Benyamin Netanyaxu AQSH vositachiligida sulhga kelishgan.
“Bu kelishuv Turkiya va Iordaniya tomonidan ham qo‘llab-quvvatlandi”, degan Barrak.
AQSH davlat kotibi Marko Rubio esa Suriyadan “jangchilarni cheklashni, ekstremistlarning hududga kirib qirg‘in uyushtirishiga yo‘l qo‘ymaslik”ni talab qildi.
“Biz barcha jinoyatlar uchun, hatto o‘z safimizdagilar uchun ham javobgarlikni talab qilamiz”, dedi davlat kotibi.
Damashq tomonidan e’lon qilingan otashkesimga qaramay, Suvaydaning ba’zi hududlarida janglar davom etayotgani haqida xabarlar bor.
Izoh (0)