Xitoyning Air China aviakompaniyasiga muntazam aviaqatnovlarni amalga oshirish uchun ruxsatnoma berildi.
“O‘zaviatsiya” agentligining xabar berishicha, ruxsatnoma O‘zbekiston va Xitoy o‘rtasida havo qatnovi to‘g‘risidagi hukumatlararo bitimga asosan berildi.
Parvozlar Toshkent—Pekin ham Urumchi—Toshkent—Urumchi yo‘nalishlarida Boeing-737-800/8 (MAX) va Airbus-330-300/200 samolyotlarida amalga oshiriladi.
2024-yil iyunida O‘zbekiston va Xitoy aviatsiya hukumatlari o‘rtasida havo qatnovi to‘g‘risidagi ikki tomonlama hukumatlararo bitimga o‘zgartirishlar kiritish, ikki davlat o‘rtasida amalga oshirilayotgan aviaqatnovlar sonini keskin oshirish, yangi havo yo‘laklarini ochish masalalari muhokama qilingandi.
O‘zbekiston tomonidan bitimdagi aviakompaniyalar soniga va parvoz manzillariga qo‘yilgan cheklovlarni olib tashlash, amaldagi aviaqatnovlar sonini har bir tomondan haftasiga 50 tadan jami 100 taga oshirish, parvozlar geografiyasini kengaytirish hamda yangi havo yo‘laklarini ochish taklif etilgandi. Muzokaralar natijasiga ko‘ra ikki davlat aviatsiya ma’muriyatlari o‘rtasida tegishli hujjat imzolangandi.
Air China — Xitoydagi eng yirik aviakompaniyalardan biri bo‘lib, 1988-yilda tashkil etilgan. Kompaniya dunyoning 200 ga yaqin shahariga reyslarni amalga oshiradi. Uning havo kemalari parkida 500 dan ortiq samolyot bor.
Izoh (0)