Raqobat qo‘mitasi tomonidan “O‘zbekneftgaz”ga nisbatan ish qo‘zg‘atildi. Bu haqda qo‘mita axborot xizmati xabar berdi.
Ma’lum qilinishicha, Raqobat qo‘mitasining Toshkent shahar hududiy boshqarmasi tomonidan, Toshkent shahrida o‘tkazilayotgan davlat xaridlarida “Raqobat to‘g‘risida”gi hamda “Davlat xaridlari to‘g‘risida”gi qonunlariga rioya etilishi yuzasidan elektron maxsus axborot portallaridagi ma’lumotlardan foydalangan holda doimiy monitoring o‘tkazilmoqda.
Olib borilgan o‘rganishlar natijasiga ko‘ra, “O‘zbekneftgaz” AJ tomonidan maxsus axborot portali orqali o‘tkazilgan 2 ta jami 4,8 milliard so‘mga yaqin eng yaxshi takliflarni tanlash savdolarida “Raqobat to‘g‘risida”gi qonunning 29-moddasi talablari buzilganlik alomatlari aniqlandi.
Yuqoridagilarga ko‘ra, “Raqobat to‘g‘risida”gi qonun va Vazirlar Mahkamasining 225-sonli qarori bilan tasdiqlangan nizom talablari buzilishi alomatlari bilan “O‘zbekneftgaz” AJga nisbatan ish qo‘zg‘atildi.
Qo‘zg‘atilgan ish o‘rnatilgan tartibda ko‘rib chiqilib, qaror qabul qilingandan so‘ng qo‘shimcha axborot berilishi aytildi.
Avvalroq Raqobatni rivojlantirish va isteʼmolchilar huquqlarini himoya qilish qo‘mitasi UNG Petro kompaniyasining xususiylashtirilishi bo‘yicha kelishuvni o‘rganayotgani haqida xabar berilgandi.
Abdulaziz Komilovning o‘g‘li Doniyor Komilovga tegishli Petroleum Technology Group kompaniyasi O‘zbekistonda 78 ta zapravkaga ega bo‘lgan UNG Petro kompaniyasining yangi egasiga aylangan. Bunga qadar zapravkalarning egasi “O‘zbekneftgaz” kompaniyasi bo‘lgan. Davlat aktivlarini boshqarish agentligi 2023-yil may oyida 78 ta zapravkaga ega bo‘lgan UNG Petro MCHJ xususiylashtirilishini eʼlon qilgan edi.
Izoh (0)