Рақобат қўмитаси томонидан “Ўзбекнефтгаз”га нисбатан иш қўзғатилди. Бу ҳақда қўмита ахборот хизмати хабар берди.
Маълум қилинишича, Рақобат қўмитасининг Тошкент шаҳар ҳудудий бошқармаси томонидан, Тошкент шаҳрида ўтказилаётган давлат харидларида “Рақобат тўғрисида”ги ҳамда “Давлат харидлари тўғрисида”ги қонунларига риоя этилиши юзасидан электрон махсус ахборот порталларидаги маълумотлардан фойдаланган ҳолда доимий мониторинг ўтказилмоқда.
Олиб борилган ўрганишлар натижасига кўра, “Ўзбекнефтгаз” АЖ томонидан махсус ахборот портали орқали ўтказилган 2 та жами 4,8 миллиард сўмга яқин энг яхши таклифларни танлаш савдоларида “Рақобат тўғрисида”ги қонуннинг 29-моддаси талаблари бузилганлик аломатлари аниқланди.
Юқоридагиларга кўра, “Рақобат тўғрисида”ги қонун ва Вазирлар Маҳкамасининг 225-сонли қарори билан тасдиқланган низом талаблари бузилиши аломатлари билан “Ўзбекнефтгаз” АЖга нисбатан иш қўзғатилди.
Қўзғатилган иш ўрнатилган тартибда кўриб чиқилиб, қарор қабул қилингандан сўнг қўшимча ахборот берилиши айтилди.
Аввалроқ Рақобатни ривожлантириш ва истеъмолчилар ҳуқуқларини ҳимоя қилиш қўмитаси UNG Petro компаниясининг хусусийлаштирилиши бўйича келишувни ўрганаётгани ҳақида хабар берилганди.
Абдулазиз Комиловнинг ўғли Дониёр Комиловга тегишли Petroleum Technology Group компанияси Ўзбекистонда 78 та заправкага эга бўлган UNG Petro компаниясининг янги эгасига айланган. Бунга қадар заправкаларнинг эгаси “Ўзбекнефтгаз” компанияси бўлган. Давлат активларини бошқариш агентлиги 2023 йил май ойида 78 та заправкага эга бўлган UNG Petro МЧЖ хусусийлаштирилишини эълон қилган эди.
Изоҳ (0)