Toshkent shahridagi umumta’lim maktablari oshxonasi auksion savdolari orqali sotilishi to‘xtatildi. Maktab direktorlariga bosim o‘tkazib, oshxonalarni sotuvga qo‘yishni talab qilayotganlarga qarshi kurashiladi. Buning uchun vazirga murojaat boti ham ishlab turibdi. Bu haqda vazir Hilola Umarova OAV vakillari bilan bo‘lgan matbuot anjumanida ma’lum qildi.
Bugun, 28-avgust kuni Toshkent shahridagi 298-maktabda maktabgacha va maktab ta’limi vaziri Hilola Umarova OAV vakillari bilan uchrashib, ularni qiziqtirgan savollarga javob berdi.
![](/static/2024/08/28/photo_2024-08-28_19-25-26 (2)-tObwerhV.jpg)
Matbuot anjumanida so‘z olgan “Daryo” jurnalisti nashrda Toshkent shahrida joylashgan umumiy o‘rta ta’lim maktablari oshxonasi tez orada tijorat maskanlariga aylanishi mumkinligi, Olmazor tumanidagi maktab direktorlari tuman hokimi bosimi bilan oshxonalarni auksion savdoga chiqarishga majbur bo‘layotgani haqida maqola e’lon qilinganini aytib, “vazir sifatida sizga maktab o‘quvchilarining sog‘lom ovqatlanishi muhimmi? Maktab oshxonalarining auksion savdoda qimmat narxga sotilib, asosiy maqsad pul topish bo‘lib qolishi o‘quvchilar ovqatining sifati va narxiga ta’sir qilmaydimi?”, deya savol berdi.
“Sog‘lom ovqatlanish masalasi maktabgacha ta’lim tizimida ham, maktab ta’limi tizimida ham eng asosiy masalalarimizdan biri hisoblanadi. Shuningdek, maktablarda taqiqlangan mahsulotlar sotilishining oldini olishga barcha rahbarlarni jalb qilganmiz. Hozir maktab o‘quvchilarining sog‘lom ovqatlanishini yo‘lga qo‘yish uchun qaror ishlanmoqda. Kecha oshxonalarni auksionga chiqarish bo‘yicha berilgan topshiriqlarni nazoratga oldik”, dedi vazir.
![](/static/2024/08/28/photo_2024-08-28_19-25-26-HRksBPDv.jpg)
Hilola Umarovaning tan olishicha, hududlarda boshqa bir tashkilotlar tomonidan o‘z manfaatini ko‘zlab vazirlik tarkibidagi tashkilotlarga noqonuniy topshiriqlar berish holati (“Daryo”dagi maqolalarda Olmazor tumani hokimi tumandagi maktab direktorlariga bosim o‘tkazib, maktab oshxonalarini avvaliga o‘ziga tegishli ekani aytilayotgan tadbirkorga berishga uringani, keyinchalik oshxonalarni auksion savdoga chiqarish bo‘yicha topshiriqlar bergani yozilgan) sodir bo‘lmoqda.
“Biz tizimdagi xodimlarimizga doim aytganmiz, shunaqa holatlar bo‘lsa vazirlikning ishonch telefoniga yoki vazirga murojaat boti orqali bu haqda xabar berish so‘ralgan. Vazirga murojaat botini doim kuzatib boraman va muammolarni hal qilishga urinaman”, dedi vazir.
Hilola Umarovaning qo‘shimcha qilishicha, vazirlik qoshida pedagoglarga bosim o‘tkazish yoki ularga noqonuniy topshiriq berganlarga qarshi kurashuvchi alohida jamoa, boshqarma ham tashkil etilgan.
![](/static/2024/08/28/photo_2024-08-28_19-25-26 (5)-W8LItnWT.jpg)
“Ushbu boshqarma pedagoglarga bosim qilayotganlarni u kim bo‘lishidan qat’i nazar qattiq nazoratga olgan”, deydi u.
Vazir “Daryo” jurnalistiga xodimi — Toshkent shahar Maktabgacha va maktab ta’limi boshqarmasi boshlig‘i Nilufar Husanovaning xatti-harakati haqida o‘qiganini, bu holat takrorlanmasligi uchun mas’ul ogohlantirilganini qo‘shimcha qildi.
Izoh (0)