Raqobatni rivojlantirish va isteʼmolchilar huquqlarini himoya qilish qo‘mitasi “Agrobank” ATBning Toshkent viloyati boshqarmasiga nisbatan raqobat qonunini buzilganlik holati bo‘yicha chora qo‘lladi.
Qo‘mita tomonidan o‘tkazilgan o‘rganish davomida fermer xo‘jaliklari “Agrobank” ATB Chinoz filiali bilan kredit shartnomasi va taʼminotchi tashkilotlarni ixtiyoriy tanlash bo‘yicha shartnoma imzolagan bo‘lsa-da, bank tomonidan fermer xo‘jaliklaridan ushbu kreditlarning ajratilishida mablag‘lardan erkin foydalanishiga hamda moddiy resurslar yetkazib beruvchilarni ixtiyoriy tanlashida bir qator sunʼiy hamda byurokratik to‘siqlar mavjudligi aytilgan.
Bank matbuot xizmatining qayd etishicha, mazkur nizoli holat dastlab tumanlararo, so‘ngra viloyat maʼmuriy sudida ko‘rib chiqilgan bo‘lib, apellyatsiya instansiyasi qo‘mita tomonidan keltirilgan vajlarni qisman to‘g‘ri deb topgan, biroq qo‘mita tomonidan qo‘llangan moliyaviy jarima chorasi noto‘g‘ri hisoblangani uchun uni bekor qilish to‘g‘risida qaror qabul qilgan.
Bu kabi jarayonlar “byurokratik to‘siq” sifatida baholanishi noto‘g‘ri bo‘lib, bank ushbu jaryonlarni Vazirlar Mahkamasining 533 va 130-sonli qarorlariga asosan amalga oshirgan hamda fermerlardan tegishli maʼlumotnomalar jamg‘armadan ajratilgan kreditlarni maqsadsiz sarflanishining oldini olish uchun belgilangan tartibda so‘ralgan. Taʼminotchini tanlash esa fermer xo‘jaliklari ixtiyorida ekanligini maʼlum qilamiz, deyiladi xabarda.
Shuningdek, “Agrobank” bank faoliyati xalqaro tashkilotlar tomonidan ham o‘rganib borilishi, mazkur o‘rganishlar davomida bank tomonidan byurokratik to‘siqlar mavjudligi yuzasidan eʼtirozlar bildirilmaganini ma’lum qilgan.
Eslatib o‘tamiz, iyun oyida amaldagi qonunchilik va Markaziy bank talablariga rioya qilinmagani va aniqlangan qoidabuzarliklar uchun 11 ta bankka nisbatan jarima sanksiyalari qo‘llangan edi.
Izoh (0)