Makroiqtisodiy va hududiy tadqiqotlar instituti (MHTI) Toshkentdagi yirik supermarketlarda oziq-ovqat mahsulotlari narxini o‘rgandi.
Qayd etilishicha, MHTI mutaxassislari iyul oyida (tahlil 13-iyun va 11-iyul kunlari o‘tkazilgan) Toshkent shahridagi yirik supermarketlarda 21 nomdagi oziq-ovqat mahsulotlari narxining o‘zgarishini ko‘rib chiqqan.
Monitoring natijalari 12 xil mahsulot bo‘yicha minimal narxlar o‘tgan oydagiga nisbatan pasayganini ko‘rsatgan. Narxlarning eng yuqori pasayishi pomidor (-64,3 foiz), banan (-31,9 foiz) va bodring (-31,1 foiz) mahsulotlarida qayd etilgan.
To‘qqiz nomdagi mahsulotning eng past narxi o‘zgarishsiz qolgan. Bular: guruch, bug‘doy uni, shakar va boshqalar. Tahlil qilinayotgan oziq-ovqat mahsulotlari minimal narxining oshishi qayd etilmagan.
2023-yil may oyida O‘zbekiston Markaziy banki 2023-yil birinchi choragi uchun “Iste’mol kayfiyati sharhi”ni e’lon qilgandi. Tadqiqotda respondentlarning daromadlari va xarajatlari, ularning jamg‘armaga moyilligi, shuningdek, kelajakdagi ehtiyojlari tahlil qilingan. Euromonitor International ma’lumotlariga ko‘ra, o‘zbekistonliklar daromadining 46,5 foizini oziq-ovqatga sarflaydi.
Izoh (0)