Oliy Majlis yuqori palatasiga Qashqadaryo viloyatidan saylangan Abdurahim Erkayev Senat yalpi majlisida o‘zbekistonliklarda sud-huquq tizimiga ishonch so‘nib borayotgani haqida gapirib, bu borada “Afrikaning ayrim mamlakatlaridan ham ortdamiz”, dedi.
Senatorga ko‘ra, O‘zbekiston o‘tgan yili jahon odil sudlov loyihasining huquq ustuvorligi indeksi bo‘yicha besh pog‘onaga pastlab, 83-o‘rinni egallagan.
Jahon odil sudlov loyihasining huquq ustuvorligi indeksi bo‘yicha besh pog‘onaga pastlab 83-o‘rinni egallab turibmiz. Besh pog‘ona ko‘tarilganimizda boshqa gap edi. Endi xuddi shu indeksning tarkibiga kiruvchi fuqarolik odil sudloviga erishish darajasining yuqoriligi subindikatorida mamlakatimiz o‘rni o‘tgan yilda 10 pog‘onaga pasaydi va 96-o‘rindan 106-o‘ringa chiqdik. Afrikaning ayrim mamlakatlaridan ham orqadamiz, deydi Qashqadaryo viloyatidan saylangan senator Abdurahim Erkayev.
Abdurahim Erkayevning aytishicha, O‘zbekistonda ko‘p holatlarda sud qarorlarining ijrosi kechiktiriladi yoki bajarilmaydi.
Bu holat nizolarni hal qilishda odil sudlovga erishish qiyinligi, sud tizimiga ishonchning susayib borayotgani, murojaatlarni ko‘rib chiqishda adolat va xolislik prinsiplari aholi tomonidan sezilmayotganidan dalolat beradi. Ko‘p holatlarda sud qarorlarining ijrosi kechiktiriladi yoki bajarilmaydi, deydi senator.
Senator mazkur indikatorlarni hisoblashda aholi o‘rtasida ham har xil so‘rovlar o‘tkazilishini aytdi.
Keyingi yillardagi sud-huquq tizimini isloh qilish bo‘yicha amalga oshirilgan ishlarimizning natijasi qani? Natijasi yo‘q. Yaxshi emas, orqaga ketish bor. Kim ishlayotgan bo‘lsa ijobiy natijalari bor. Salbiy natija qayd etilgan joylarda ishlar o‘z holiga tashlab qo‘yilgan, dedi u.
Izoh (0)