Yevropa Ittifoqi chet eldagi foydali qazilmalarni o‘zlashtirishni boshlaydi

Yevropa Ittifoqi 4-iyun kuni metall va minerallar bilan bog‘liq 13 ta yangi xomashyo loyihasini e’lon qildi. Bu haqda Reuters xabar berdi.

Ushbu metallar mudofaa va aerokosmik sohada raqobatbardosh bo‘lish uchun zarur hisoblanadi.

Xitoy aprel oyida nodir yer metali eksportiga cheklovlar qo‘yish to‘g‘risidagi qaror qilgan edi. Bu diplomatlar, avtomobil ishlab chiqaruvchilar va Yevropa va boshqa mamlakatlar kompaniyalarini sarosimaga solib qo‘ygan.

“Biz barcha davlatlarga, xususan, Xitoy kabi davlatlarga qaramlikni kamaytirishimiz zarur. Eksport taqiqlari diversifikatsiya qilish istagimizni kuchaytirmoqda”, dedi Yevropa komissari Stefan Sejurn.

Xitoy avtomobillar va qiruvchi samolyotlardan tortib maishiy texnikagacha ishlatiladigan magnitlarni qayta ishlash bo‘yicha global quvvatning 90 foizdan ortig‘ini nazorat qiladi. Shuningdek, u qayta tiklanadigan energiya, ayniqsa, noyob yer minerallari, akkumulyator va quyosh panellari uchun ko‘plab asosiy manbalarning yetkazib beruvchisi hisoblanadi. Bryussel bu vaziyatni o‘zgartirishni istaydiganlar qatorida yetakchi.

Yevropa Ittifoqi 2023-yilda “Muhim xomashyo to‘g‘risida”gi qonun qabul qilgan. Unga ko‘ra, 2030-yilgacha ittifoq ehtiyojlarining 10 foizini qazib olish, 40 foiziga ishlov berish va 25 foizini qayta ishlashni maqsad qilgan.

Yangi loyihalarning 10 tasi elektromobil akkumulyatorlari va ularni saqlash uchun zarur bo‘lgan materiallar, jumladan, litiy, kobalt, marganets va grafitga yo‘naltiriladi.

Malavi va Janubiy Afrikada 2 ta loyiha ishga tushirilishi aytilgan. Boshqa loyihalar Britaniya, Kanada, Grenlandiya, Qozog‘iston, Madagaskar, Norvegiya, Serbiya, Ukraina, Zambiya, Braziliya va Fransiyaning Yangi Kaledoniya hududida amalga oshiriladi. Britaniyada volfram, Ukraina va Grenlandiyada esa grafit qazib olish rejalashtirilgan. Volfram mudofaa sanoati uchun kalit hisoblanadi. Bu loyiha GreenRoc Strategic Materials 2 tomonidan boshqariladi.