Atir — ayol obrazining bir qismi. U insonlarda nafaqat kayfiyat, balki o‘ziga xos taassurot ham uyg‘otadi. Ammo uzoq vaqt tanlangan atirning hidi bor-yo‘g‘i bir necha daqiqada yo‘qolib ketishi holatlari ham kuzatiladi. Bu hafsalani pir qiladi hamda atir sifati yoki tanlov to‘g‘riligiga shubha uyg‘otadi.
Aslida esa, hidning uzoq saqlanishi faqat parfyumning markasi yoki narxiga bog‘liq emas. Bunda terining holati, foydalanish usuli, hatto ob-havo va tana harorati kabi omillar muhim rol o‘ynaydi. Quyida atirning davomiyligiga ta’sir qiladigan to‘rtta asosiy xatoni tahlil qilamiz.
- Quruq teri atirni o‘ziga singdirib yuboradi
Teringiz quruq bo‘lsa, atirning uzoq vaqt taralishi haqida orzu ham qilmang. Chunki quruq terida hidning “o‘rnashib oladigan” qatlami bo‘lmaydi, natijada atir darrov uchib ketadi. Bu holat xuddi pergament qog‘ozga atir sepishga o‘xshaydi: u darrov yo‘qoladi, hatto iz ham qolmaydi.
Bunday holatda eng oddiy yechim atir sepishdan avval teriga yengil, hidsiz namlantiruvchi krem surtishdir. Bu terida himoya qatlami hosil qiladi va atir tomchilari shu qatlamga yopishib, sekin-asta tarala boshlaydi. Ayniqsa, sovuq mavsumda bu usul yaxshi samara beradi.
- Atirni havoga sepish natija bermaydi
Ba’zi odamlar atirni havoga sepib, uning mayda tomchilari ostida qolishni yoqtirishadi. Aslida bu usul faqat ko‘zni quvontiradi, lekin hidni ushlab qolmaydi. Har qanday atir teri bilan to‘g‘ridan to‘g‘ri aloqani talab qiladi, ayniqsa, qon yurishi faol bo‘lgan nuqtalarga sepish maqsadga muvofiq hisoblanadi: masalan, o‘mrov suyagi, tirsak ichi, tizza kabi joylarda.
Ba’zan atir matoda ham uzoq vaqt saqlanadi, buning uchun material tabiiy bo‘lishi kerak. Moda blogerlari parfyumni paltoning ichki tomoniga yoki sharfga sepishni tavsiya qilishadi. Bu usul hidning bir necha soat emas, balki kun davomida ham sezilib turishiga yordam beradi.
- Atir va tualet suvi farqini biling
Tualet suvi (eau de toilette) tarkibida ifor beruvchi modda kamroq — taxminan 5–15% bo‘ladi. Agar atir isi siz bilan butun kun davomida qolishini istasangiz, flakonda EDP (eau de parfum) yoki extrait de parfum yozuvi bor atirni izlang. Bunday atirlar ifori chuqurroq, boyroq bo‘ladi va terida uzoq vaqt saqlanadi.
- Tana harorati, issiq ob-havo va jismoniy faollik ta’sir qiladi
Eng uzoq vaqtga yetadigan atir ham, agar siz jismonan faol bo‘lsangiz yoki tashqarida havo juda issiq bo‘lsa, tez bug‘lanadi. Chunki tana harorati oshganda atir molekulalari qisqa vaqtda uchib ketadi. Shu sababli bir xil brendga tegishli parfyum yozda boshqacha, qishda esa butunlay boshqa tarzda ifor beradi.
Izoh (0)