Toshkent shahri Sergeli tumani Qipchoq ko‘chasida uchta avtomashina ishtirokida yo‘l-transport hodisasi sodir bo‘lgani to‘g‘risida xabar berilgandi. Poytaxt IIBB Yo‘l harakati xavfsizligi boshqarmasiga ko‘ra, hodisa oqibatida bir kishi halok bo‘lgan.
Qayd etilishicha, 9-iyul kuni soat 19:40 larda Sergeli tumani Qipchoq ko‘chasida 43 yoshli D.U. (ayol) boshqaruvida bo‘lgan Spark rusumli avtomashina 40 yoshli A.A. boshqaruvidagi Spark hamda 22 yoshli I.M.ning Honda rusumli avtomashinasi bilan to‘qnashgan.
YTH oqibatida D.U. boshqaruvida bo‘lgan Spark rusumli avtomashinasi yo‘lovchisi — 33 yoshli ayol shifokorlarning sa’y-harakatlariga qaramasdan, olgan tan jarohatlari natijasida vafot etgan.
Spark rusumli avtomashina haydovchisi D.U. va Honda yo‘lovchisi bo‘lgan 22 yoshli M.R. tan jarohati olib, shifoxonaga yotqizilgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Tergov davom etmoqda.
Avvalroq Andijon viloyatida haydovchilik guvohnomasiga ega bo‘lmagan yigit mashina boshqarib, avtohalokat sodir etgani, Toshkent viloyatida boshqaruvni yo‘qotgan Damas kanalga tushib ketgani to‘g‘risida xabar berilgandi. Shuningdek, Navoiyda sodir bo‘lgan YTHda bir oilaning 5 a’zosi halok bo‘lgan edi.
Izoh (0)