Isroil bilan urushda halok bo‘lgan falastinlik shahidlar va siyosiy mahbuslarning yuzlab qarindoshlari haj ziyoratini ado etish uchun olib kelindi. Bu haqda Arab News xabar berdi.
Bu ziyorat Saudiya Arabistonining “Ikki muqaddas masjid xodimi mehmonlar dasturi” doirasida amalga oshirilmoqda. Islom ishlari, da’vat va hidoyat vazirligi 2-iyun kuni G‘azodan 500 nafar ziyoratchini qabul qildi. Shu bilan Falastindan hajga boruvchi va keluvchilar soni 1000 nafarga yetkazildi.
Ziyoratchilar “Qirol Abdulaziz” nomidagi xalqaro aeroportga yetib kelgan va keyinchalik Makka shahridagi maxsus turar joyida kutib olingan. Mehmonlar Saudiya Arabistoni va uning rahbariyatiga minnatdorchilik bildirgan.
“Ikki muqaddas masjid xodimi mehmonlar dasturi” 1996-yilda tashkil etilganidan beri minglab haj va umra ziyoratchilarini qabul qilgan. Dastur doirasida 2025-yilda 100 ta davlatdan 2443 nafar inson haj ziyoratini amalga oshirishi kutilmoqda.
Saudiya Arabistoniga 2025-yilgi haj mavsumi uchun xorijdan bir milliondan ortiq ziyoratchi kelgan. Hajga kelganlarning 53 foizi erkaklar, 47 foizi esa ayollardir. Ziyoratchilarning 94 foizi havo yo‘li bilan, 4,83 foizi quruqlikdagi chegara punktlari orqali, taxminan, 0,5 foizi esa dengiz orqali yetib kelgan.
Izoh (0)