Xonanda Zahida yaqinda “Ayol qalbi” ko‘rsatuvida mehmon bo‘lib, san’at yo‘li, shaxsiy hayoti va boshdan kechirgan sinovlari haqida samimiy so‘zlab berdi.
Cover up loyihasiga qatnashganimga sakkiz yil bo‘ldi. Aslida, besh yoshimdan buyon san’at sohasidaman. Oilamizda san’atga aloqador hech kim bo‘lmagan — deyarli hammasi harbiy sohada faoliyat yuritgan, hattoki buvim ham, deydi xonanda.
Shu bilan birga, Zahida onasining iste’dodli bo‘lgani, lekin bobosi ruxsat bermagani uchun san’at yo‘lidan bora olmagani haqida gapirdi.
Onamda talant bor, ovozlari juda zo‘r. Yoshligida san’atkor bo‘lishni juda istagan ekanlar. Lekin bobom bu soha bilan shug‘ullanishlariga qarshi bo‘lgan. Meni esa kichkinaligimda bitta shokolad berib aldab, o‘qishga majbur qilgan. Endi rahmat aytaman: hozir shu tufayli san’at orqali non topyapman, deydi u.
Zahida Konservatoriyada o‘qib yurganida, yangi kelinlik paytida Cover up loyihasida ishtirok etgan.
4-kurs edim, loyiha haqida o‘ylamaganman. Turmush o‘rtog‘imning shogirdlari mendan yashirincha ariza topshirib yuborgan ekan. Keyin esa qaynota-qaynonam: “Biz sizni televideniyeda ko‘rishni xohlaymiz”, deyishgan. Aslida turmush o‘rtog‘im san’atga boshida qarshi edi. Lekin loyiha orqali san’atga qiziqib qoldilar, deydi u.
Zahidaning turmush o‘rtog‘i bilan tanishuvi ham ijod orqali bo‘lgan.
Tanishimning to‘yga chiqadigan guruhi bor edi. “Qiz bola ovozi kerak”, deyishganda rozi bo‘ldim. Ovoz yozishga bordik, studiyada ishlovchi odam qovog‘i uyilgan, uyqusirab yotgan ekan. Shuning uchun yozuv ko‘ngildagidek bo‘lmadi. Keyinchalik yana o‘sha studiyaga bordik va oxiri do‘stlashib, aka-singil bo‘ldik. Keyin esa turmush qurdik. Turmush o‘rtog‘im bilan juda yaqinmiz, shu sababli ota uyimga borsam ham, bir kundan ko‘p turolmayman. Chunki biz bir-birimizga juda o‘rganib qolganmiz, uzoq vaqt bir-birimizdan uzoqda yurishga qiynalamiz, deydi Zahida.
Xonanda shaxsiy hayoti haqida so‘zlab, oilaviy muammolarni ochiq muhokama qilish kerakligini ta’kidladi: Bir video ko‘rib, ta’sirlangandim. Ayol erini xiyonatda ushlaydi, lekin er: “Sen o‘zingga qaramaysan, faqat uni olib ber, buni olib ber deysan, mening xohishim bilan qiziqmaysan”, deydi. Aslida, bu muammo oldin gaplashib olinishi kerak edi. Shunda katta gunohlarga borilmasdi.
Zahida asl ismi Dilso‘z ekani, nega taxallus ostida ijod qilishi haqida gapirdi:
Dilso‘zning “Begim-ey” degan qo‘shig‘i chiqqanida hamma “sen aytganmisan” deb qo‘yishmagan. Uni asl ismi Go‘zal bo‘lgan, Dilso‘z taxallusi ostida ijod qiladigan ijodkor kuylagan. Keyin qo‘shiqning klipi chiqqach, “ha, sen emas ekansan” deyishgan. O‘z ismim bilan chiqishni xohlaganman, lekin hamma “Dilso‘z desang, adashib ketishadi” deyishgan, shu sabab Zahida taxallusini tanlaganmiz, deydi u.
Xonanda qaynota-qaynonasini san’atga juda shinavanda insonlar sifatida tasvirlaydi. Zahida aslida ular bilan birga yashashni istaganini, ammo, afsuski, hozirda alohida yashayotganini aytadi.
Zahida onasining yolg‘iz o‘zi ularni tarbiyalaganini eslab, bolalikdagi og‘riqli xotiralari bilan bo‘lishdi:
Onam meni o‘zlari katta qilganlar. Mendan keyin ukam bor. Dadam boshqa ayol bilan ketganlar. Ba’zida maktabda o‘rtoqlarim bilan turganimda dadam tanimaganday yonimdan o‘tib ketardilar. Dugonalarim “qara, dadang o‘tyapti”, desa, “yo‘q, adashyapsizlar”, derdim. Hozir esa dadam qaytib kelganlar. Ular yaxshi odam — menga ham, ukamga ham hech qachon yomon so‘z aytmaganlar
Ijodkor hayotida chuqur iz qoldirgan eng og‘ir sinovlardan biri — farzandini yo‘qotgani bo‘lgan.
Dunyoga kelgan farzandimni yo‘qotganman. Ismini Xadicha qo‘ygan edik. Bir necha haftaligida vafot etdi. Men buni “ko‘z tegishi” deb aytolmayman — bu peshanamda bor ekan, deydi xonanda.
Izoh (0)