Xitoy 22-iyun kuni BMT Xavfsizlik Kengashining favqulodda majlisida AQSHning Erondagi Fordo, Natanz va Isfahondagi yadroviy obyektiga hujum qilganini qoraladi. Bu haqda Global Times xabar berdi.
“Xitoy AQSHning Eronga hujumlarini va MAGATE kafolati ostida yadroviy obyektlarning bombardimon qilinishiga qarshi. Qo‘shma Shtatlarning xatti-harakatlari BMT nizomi, xalqaro huquqning maqsad va tamoyillarini, shuningdek, Eronning suvereniteti, xavfsizligi va hududiy yaxlitligini jiddiy buzadi. Ular Yaqin Sharqdagi keskinlikni kuchaytirdi va yadro qurolini tarqatmaslik bo‘yicha xalqaro rejimga og‘ir zarba berdi”, dedi Xitoyning BMTdagi doimiy vakili Fu Kong.
U xalqaro hamjamiyat adolatni qo‘llab-quvvatlashi, vaziyatni yumshatishi, tinchlik uchun aniq sa’y-harakatlarni amalga oshirishi kerakligini ham ta’kidlagan.
“Yaqin Sharqdagi keskinlikning kuchayishi sharoitida Xitoy vaziyatning izdan chiqish xavfidan jiddiy xavotirda. Isroil keskinlashuvning oldini olish va urushning tarqalishiga qat’iy yo‘l qo‘ymaslik uchun zudlik bilan o‘t ochishni to‘xtatishi kerak. Tomonlar xalqaro huquq normalariga rioya qilishi, kuch ishlatishni jilovlashi, ziddiyatni kuchaytirishi va olovga moy sepishdan qochishi lozim”, deya qo‘shimcha qildi Fu.
U tinch aholini himoya qilishga chaqirib, Xitoy urush oqibatida aholi orasida ko‘plab qurbonlar borligidan chuqur qayg‘uda ekanini bildirgan. Xitoy Yaqin Sharqda tinchlik va barqarorlikni tiklash uchun sa’y-harakatlarni amalga oshirishga tayyorligi ta’kidlangan.
Izoh (0)