Isroil harbiylari G‘azodagi maktabga 27-iyul kuni uyushtirgan hujum oqibatida kamida 30 nafar falastinlik halok bo‘ldi. Bu haqda CNN nashri xabar berdi.
G‘azo Sog‘liqni saqlash vazirligi va fuqarolik mudofaasi tashkilotlari hujumni tasdiqlagan. Harbiylar hech qanday ogohlantirishsiz hujumga o‘tgani uchun tinch aholi orasida ko‘plab qurbonlar bo‘lgani maʼlum qilingan.
Isroil hujumi G‘azo shahridan janubdagi Dayr-al-Balah hududida ro‘y bergan. Dastlab harbiy samolyotlar, so‘ngra quruqlik bo‘linmalari maktab hududiga bombalar uloqtirgan.
Hujum oqibatida kamida 30 kishi halok bo‘lgani tasdiqlangan. Yana 100 dan ortiq falastinlik asosan o‘rta va og‘ir darajadagi jarohat bilan kasalxonalarga olib ketilgan.
Isroil harbiylari yo‘q qilingan maktab hududida HAMAS qo‘mondonlik va nazorat markazi bo‘lganini aytgan. Halok bo‘lganlar ham tashkilotga aʼzo bo‘lgan “terrorchilar” ekani xabar qilingan.
Al-Aqso shifoxonasi matbuot kotibi, doktor Xalil al-Daqronga ko‘ra, hujumda asosan ayollar va bolalar halok bo‘lgan. Jasadlarda tana qismlarining kuchli darajada ezilishi, kuchli qon yo‘qotish, suyaklarning parchalanishi holatlari kuzatilgan.
Izoh (0)