Eronga qarshi Amerika–Isroil operatsiyasi boshlanganiga 3 kundan oshdi. 2-mart kuni Isroil Livan hududiga zarba berdi, Eron esa Saudiya Arabistonidagi Aramco neft zavodini dron bilan nishonga oldi. Mintaqadagi keskinlik ortidan diplomatik munosabatlar uzilmoqda, neft narxi keskin oshdi, O‘zbekiston esa fuqarolarni xavfsiz evakuatsiya qilish choralarini kuchaytirdi.
Isroil Livan hududiga ham zarba berdi
2-mart kuni Isroil harbiylari Livan hududiga bir necha bor zarba berdi. Asharq Al-Awsat xabariga ko‘ra, hujumlar oqibatida kamida 31 kishi halok bo‘lgan, 149 kishi jarohatlangan.
Isroil tomoni zarbalar “Hizbulloh” guruhi tomonidan Isroilga qarata uchirilgan raketalarga javob ekanini ma’lum qildi. Guruh Eron oliy rahnamosi Oyatulloh Ali Xomanaiy o‘ldirilgani uchun qasos olish maqsadida hujum qilganini bildirgan.
Eron Saudiya neft infratuzilmasini nishonga oldi
2-mart kuni Eron droni Saudiya Arabistonining Aramco kompaniyasiga tegishli Ras Tanura zavodiga zarba berdi. Bloomberg ma’lumotiga ko‘ra, mazkur obyekt kuniga 550 ming barrel xom neftni qayta ishlash quvvatiga ega.
Zarbadan so‘ng zavod faoliyati to‘xtatilgan, yong‘in nazoratga olingan. Saudiya hukumati va Aramco hozircha rasmiy izoh bermadi.
BAA elchixonasini yopdi
Birlashgan Arab Amirliklari Eron tomonidan berilgan zarbalar ortidan Tehrondagi elchixonasini yopishini va diplomatik xodimlarini chaqirib olishini e’lon qildi. BAA TIV bayonotida Eronning raketa hujumlari milliy suverenitet va xalqaro huquqni buzishi sifatida baholangan.
Xomanaiyga uyushtirilgan hujum tafsilotlari
CNN manbalariga ko‘ra, Isroil va AQSH razvedkasi bir necha oy davomida Oyatulloh Ali Xomanaiyni kuzatgan. 28-fevral kuni Tehrondagi maxsus majmuaga yuqori aniqlikdagi zarbalar berilgan.
Isroil armiyasi rahbariyati operatsiyani “Arslon na’rasi” deb atagan. Oradan bir necha soat o‘tib, AQSH prezidenti Donald Tramp Xomanaiy vafot etganini e’lon qilgan.
Netanyaxu ofisiga zarba berilgani aytildi
Islom inqilobi qo‘riqchilari korpusi ma’lumotiga ko‘ra, tongda Isroil bosh vaziri Binyamin Netanyaxuning ofisiga zarba berilgan, uning taqdiri bir muddat noma’lumligicha qolgan.
Biroq Netanyaxu o‘zining o‘ldirilgani haqidagi xabarlardan keyin omma oldida ko‘rinish berdi. U chiqishida: “Men eronliklar Yevropani nishonga olishini aytgandim. Shunday ham bo‘ldi”, dedi. Isroil bosh vaziri bu bilan Eronning Kiprga bergan zarbasini nazarda tutganini ma’lum qildi.
O‘zbekiston fuqarolari uchun tavsiyalar
Vaziyat keskinlashgani ortidan O‘zbekistonning Isroildagi elchixonasi vatandoshlarni xavfsizlik choralariga qat’iy rioya qilishga chaqirdi hamda vaziyat barqarorlashgunga qadar mamlakatni tark etishni tavsiya etdi. “Begin” (Isroil–Misr) chegara punkti orqali chiqish imkoniyati mavjudligi qayd etildi.
Evakuatsiya va repatriatsiya
Prezident Shavkat Mirziyoyev Fors ko‘rfazi davlatlarida bo‘lib turgan o‘zbekistonliklarni vatanga qaytarish bo‘yicha bosh vazir Abdulla Aripovga topshiriq berdi.
Uzbekistan Airways 2-martdan boshlab Jidda—Toshkent yo‘nalishida repatriatsiya reyslarini yo‘lga qo‘ymoqda. Umra ziyoratchilarini Saudiya Arabistoniga olib borish esa vaqtincha to‘xtatilgan.
TIV ma’lumotiga ko‘ra, Erondan Turkmaniston orqali qaytayotgan fuqarolar “Sarahs” chegara punktida kutib olinmoqda va ularga amaliy yordam ko‘rsatilmoqda.
