Transport vazirligi Energetika vazirligi bilan birgalikda barcha mahalliy va xalqaro turdagi yo‘llardagi mavjud barcha zapravkalarda elektr quvvatlantiruvchi uskunalar o‘rnatish bo‘yicha dastur ishlab chiqilgan. Bu haqda 11-iyul kuni Oliy Majlis Qonunchilik palatasida bo‘lib o‘tgan yig‘ilishda transport vaziri Ilhom Mahkamov maʼlum qildi.
Yig‘ilishda deputat Sapargul Utemuratova, fuqarolardan elektromobillarni quvvatlash infratuzilmalarining yetarli emasligi yuzasidan ko‘plab eʼtirozlar bo‘layotganini aytib o‘tdi.
Yo‘l infratuzilmasida elektromobillar uchun qulay bo‘lgan, keng qamrovli quvvatlash stansiya tarmoqlarini yaratish bo‘yicha ishlar nazarda tutilganmi? Shuningdek, yo‘l bo‘yi obyektlarida quyosh va qayta tiklanuvchi energiya manbalarini yaratish va yo‘llarda hosil bo‘ladigan o‘sha uglerod chiqindilarini kamaytirish, zararsizlantirish bo‘yicha amalga oshirilayotgan aniq va amaliy chora-tadbirlar haqida so‘ramoqchi edim, deya savol bilan murojaat qildi deputat.
Transport vaziri Ilhom Mahkamovning aytishicha, bu faqat transport vazirligi bilan bog‘liq emas.
Bu Energetika vazirligi bilan bog‘liq masala. Umuman, prezidentimizning siyosatlari bu, yaʼni energiya samaradorligini oshirish, boshqa turdagi yoqilg‘i turlaridan voz kechib, mana shu energetikaga o‘tish jihatdan katta dasturlar ishlab chiqqanmiz.
Yuqorida aytganimdek, 82 ta nuqtada biz service area, service point konsepsiyasini ishlab chiqqanimiz, uning ichida majburiy jihatda standart qilib barchasida quvvatlantiradigan uskunalar o‘rnatilishini ko‘zda tutib ketganmiz. Bu, albatta, yetarli emas. Bu xalqaro yo‘llarda ko‘zda tutilgan. Shuningdek, barcha mahalliy va xalqaro turdagi yo‘llarga Energetika vazirligi bilan bugungi kundagi mavjud barcha “zapravka”lar — bu dizel bo‘ladimi, gaz shoxobchalari bo‘ladimi — ularga o‘rnatish masalasini qo‘yganmiz. Bundan tashqari, alohida-alohida faqat elektr zaryadlanadigan nuqtalarni, lokatsiyalarni belgilash bo‘yicha dastur ishlab chiqqanmiz, dedi transport vaziri.
Ilhom Mahkamov deputatning uglerod chiqindilarini kamaytirish bo‘yicha savolini ochiq qoldirgan.
Mazkur yig‘ilishda Ilhom Mahkamov joriy yil Taxtaqoracha dovonida pulli tunnel qurish bo‘yicha shartnoma tuzilishini maʼlum qilgan edi.
Maʼlumot uchun, O‘zbekistondagi xalqaro va davlat ahamiyatidagi avtomobil yo‘llari bo‘ylarida Service point va Service area obyektlari tashkil etiladi.
Service point — avtomobillarga yoqilg‘i quyish hamda elektromobillarni quvvatlantirish stansiyalari, umumiy ovqatlanish obyektlari, do‘konlar, texnik servis punktlari, sanitariya-gigiyena shoxobchalari.
Service area — Service point obyektlari, TIR park, motellar, avtomobillarni yuvish shoxobchalar va wi-fi nuqtalarini qamrab oladi.
Izoh (0)