“Alisher va Adizga sizlar aktyor emassizlar, deganimda mendan ranjishgan”. Otabek Musayev o‘zbek kinosidagi bugungi vaziyat va ijodiy tanaffusi sababi haqida (video)

Taniqli kinoaktyor, professional telejurnalist Otabek Musayev “Vatan”, “Qo‘rg‘oshin”, “Hur qiz” kabi ko‘plab filmlardagi turli obrazlari bilan tomoshabinlar mehrini qozongan. Otabek Musayev bir necha yillar “O‘zbekkino”ga ham rahbarlik qilgan. So‘nggi paytlarda ijodida tanaffus kuzatilayotgan ijodkor “Daryo”ga bergan intervyusida o‘zbek kinosining bugungi ahvoli haqidagi mulohazalari bilan o‘rtoqlashdi.



— Men televizor ko‘rmayman. Birinchidan, vaqtim, shuningdek, xohishim yo‘q. Olinayotgan serial va filmlarimiz sayoz. Ijodkorlar kitob o‘qishni, o‘rganishni xohlamaydi. Bu haqda hamma gapiryapti. Yuziga ton berib, labini cho‘chchaytirib chiqsa, odamlar ko‘radi, degani emas. Odamlar nafaqat ko‘rishi, balki 1-2 soat vaqtini ajratishi uchun nimadir bo‘lishi kerak, deydi Otabek Musayev. 

Otabek Musayev, shuningdek, ijtimoiy tarmoqlarning bugungi kundagi ahamiyati haqida ham to‘xtalib o‘tdi. 

— Ijtimoiy tarmoqlarni yomon, deya olmayman. Chunki bu noto‘g‘ri. Internetni hayotimizdan olib tashlay olmaymiz. Afsuski, ijtimoiy tarmoqlarda bolalar ham, kattalar ham yengil-yelpi narsalarni ko‘rib, shunga o‘rganib qolyapti. Ijtimoiy tarmoqlar ig‘voxonaga aylanib qolgan. Lekin internetdan to‘g‘ri foydalansa, u zo‘r narsa.
Hozir bog‘cha bolasining ham qo‘lida telefon. Undan telefonni olib ko‘ringchi, ovozi yetti mahallaga ketadi. O‘zimning nevaralarim ham telefondan foydalanishadi, lekin kelinim vaqtni chegaralab, kezi kelganida telefonni qo‘lidan olib qo‘yadi, deydi aktyor.

Otabek Musayev Alisher Uzoqov, Adiz Rajabov va Akbarxo‘ja Rasulovlarning teatrdagi faoliyatini boshlashiga sabab bo‘lgani haqida ham so‘zlab berdi. 

— Bir kuni “O‘zbekkino” rahbari bo‘lib yurganimda oldimga Alisher Uzoqov, Adiz Rajabov va Akbarxo‘ja Rasulovlar kelishdi. Ularga “Sizlar aktyor emassizlar, xafa bo‘lmanglar”, dedim. “Sizlarni faqat ko‘cha-ko‘yda odamlar taniydi, lekin sizlar teatr sahnasiga chiqib rol o‘ynab ko‘ringlarchi? Sahnada “bo‘lmadi bu dubl, boshqatdan olamiz”, deyolmaysizlar. O‘shanda tomoshabin “Iye, Alisher Uzoqov gapirishni bilmas ekan-ku? Adizni men yaxshi artist deb bilardim, u rol o‘ynashni bilmas ekan-ku”, deb aytadi, dedim. Ular mendan xafa bo‘lishdi.

O‘shanda “O‘zbekkino” qoshida “Kinoaktyor” teatr-studiyasini tashkil etmoqchi edim, ular oldimdan xafa bo‘lib ketishdi. To‘g‘ri “Diydor” teatr-studiyasiga, Bahodir akam Yo‘ldoshevning oldiga borishgan. Rahmatli Bahodir akam darrov menga qo‘ng‘iroq qilib, “Bularni rosa qo‘rqitib yuboribsan-ku”, degan. Shundan so‘ng ular “Diydor”da ancha vaqt ishlashdi. Teatr sahnasida rol ijro etish hammaning ham qo‘lidan kelmaydi. Garchi kinoda rollar ijro etgan bo‘lsam ham, men ikki dunyoda teatr sahnasiga chiqa olmayman, yuragim yo‘q, qo‘limdan kelmaydi, deydi Otabek Musayev.

Otabek Musayev bilan to‘liq suhbatni quyida tomosha qilishingiz mumkin.