“Алишер ва Адизга сизлар актёр эмассизлар, деганимда мендан ранжишган”. Отабек Мусаев ўзбек киносидаги бугунги вазият ва ижодий танаффуси сабаби ҳақида (видео)

Таниқли киноактёр, профессионал тележурналист Отабек Мусаев “Ватан”, “Қўрғошин”, “Ҳур қиз” каби кўплаб фильмлардаги турли образлари билан томошабинлар меҳрини қозонган. Отабек Мусаев бир неча йиллар “Ўзбеккино”га ҳам раҳбарлик қилган. Сўнгги пайтларда ижодида танаффус кузатилаётган ижодкор “Дарё”га берган интервьюсида ўзбек киносининг бугунги аҳволи ҳақидаги мулоҳазалари билан ўртоқлашди.



— Мен телевизор кўрмайман. Биринчидан, вақтим, шунингдек, хоҳишим йўқ. Олинаётган сериал ва фильмларимиз саёз. Ижодкорлар китоб ўқишни, ўрганишни хоҳламайди. Бу ҳақда ҳамма гапиряпти. Юзига тон бериб, лабини чўччайтириб чиқса, одамлар кўради, дегани эмас. Одамлар нафақат кўриши, балки 1-2 соат вақтини ажратиши учун нимадир бўлиши керак, дейди Отабек Мусаев. 

Отабек Мусаев, шунингдек, ижтимоий тармоқларнинг бугунги кундаги аҳамияти ҳақида ҳам тўхталиб ўтди. 

— Ижтимоий тармоқларни ёмон, дея олмайман. Чунки бу нотўғри. Интернетни ҳаётимиздан олиб ташлай олмаймиз. Афсуски, ижтимоий тармоқларда болалар ҳам, катталар ҳам енгил-елпи нарсаларни кўриб, шунга ўрганиб қоляпти. Ижтимоий тармоқлар иғвохонага айланиб қолган. Лекин интернетдан тўғри фойдаланса, у зўр нарса.
Ҳозир боғча боласининг ҳам қўлида телефон. Ундан телефонни олиб кўрингчи, овози етти маҳаллага кетади. Ўзимнинг невараларим ҳам телефондан фойдаланишади, лекин келиним вақтни чегаралаб, кези келганида телефонни қўлидан олиб қўяди, дейди актёр.

Отабек Мусаев Алишер Узоқов, Адиз Ражабов ва Акбархўжа Расуловларнинг театрдаги фаолиятини бошлашига сабаб бўлгани ҳақида ҳам сўзлаб берди. 

— Бир куни “Ўзбеккино” раҳбари бўлиб юрганимда олдимга Алишер Узоқов, Адиз Ражабов ва Акбархўжа Расуловлар келишди. Уларга “Сизлар актёр эмассизлар, хафа бўлманглар”, дедим. “Сизларни фақат кўча-кўйда одамлар танийди, лекин сизлар театр саҳнасига чиқиб рол ўйнаб кўрингларчи? Саҳнада “бўлмади бу дубль, бошқатдан оламиз”, деёлмайсизлар. Ўшанда томошабин “Ие, Алишер Узоқов гапиришни билмас экан-ку? Адизни мен яхши артист деб билардим, у рол ўйнашни билмас экан-ку”, деб айтади, дедим. Улар мендан хафа бўлишди.

Ўшанда “Ўзбеккино” қошида “Киноактёр” театр-студиясини ташкил этмоқчи эдим, улар олдимдан хафа бўлиб кетишди. Тўғри “Дийдор” театр-студиясига, Баҳодир акам Йўлдошевнинг олдига боришган. Раҳматли Баҳодир акам дарров менга қўнғироқ қилиб, “Буларни роса қўрқитиб юборибсан-ку”, деган. Шундан сўнг улар “Дийдор”да анча вақт ишлашди. Театр саҳнасида рол ижро этиш ҳамманинг ҳам қўлидан келмайди. Гарчи кинода роллар ижро этган бўлсам ҳам, мен икки дунёда театр саҳнасига чиқа олмайман, юрагим йўқ, қўлимдан келмайди, дейди Отабек Мусаев.

Отабек Мусаев билан тўлиқ суҳбатни қуйида томоша қилишингиз мумкин.