18-fevral, yakshanba kuni X ijtimoiy tarmog‘ida BAA bosh vaziri Muhammad bin Rashid al-Maktum mamlakatning neftga qaramligini kamaytirish tashabbusini aks ettirgan xabar joylagan. Unga ko‘ra, BААning 2023-yildagi neftga aloqador bo‘lmagan savdosi 3,5 trillion dirhamga (953 mlrd АQSH dollari) yetgan. Bu haqda Reuters xabar berdi.
Mamlakatning neftga aloqador bo‘lmagan tovarlar savdosi 2022-yil bilan taqqoslaganda 12 foizga oshgan, tovarlar va xizmatlar eksporti yangi rekordni o‘rnatgan holda 1 trillion dirhamdan oshdi, deya taʼkidlaydi tashqi savdo vaziri al-Zeyudiy ijtimoiy tarmoqlardagi alohida postida. Zeyudiyga ko‘ra, husiylarning hujumi BААning Qizil dengizdagi kemalari yo‘nalishi buzilishiga hozircha hech qanday taʼsir qilmagan.
Bu bizning mamlakatimizni bezovta qilmaydi,deb o‘ylaymiz... biz yaxshi holatdamiz va gap bu yerda bizning qanchalik chidamliligimiz hamda mavjud tizimning dunyo va mintaqa oldida turgan tahdidlarga qay darajada moslashishi haqida ketmoqda, — dedi Zeyudiy o‘z intervyusida.
Vazir CEPA (har tomonlama iqtisodiy sheriklik bitimlari) BAAning tashqi savdo ko‘rsatkichlari o‘sishida muhim ekanligini taʼkidlagan. BААning CEPA bo‘yicha birinchi hamkori Hindiston bilan savdo o‘tgan yili taxminan 4 foizga, Turkiya bilan esa ikki baravarga oshganini qo‘shimcha qilgan.
BААda xizmat ko‘rsatish sohalarining kengayishi sayohat va turizm, axborot va kommunikatsiya texnologiyalari, moliyaviy xizmatlar hamda professional xizmatlarni o‘z ichiga olsa, neftga aloqador bo‘lmagan eksportni oltin, alyuminiy, zargarlik buyumlari, mis simi hamda etilen polimerlari tashkil etadi.
Izoh (0)