“Sovuq havo massasi O‘zbekistonga to‘liq kirib kelgan” — mutaxassis

O‘zbekistonga sovuq havo massasi to‘liq kirib kelgan. Bu haqda “O‘zgidromet” bo‘lim boshlig‘i Humoyun Mag‘ripov maʼlum qildi.

 

 

Mutaxassisning aytishicha, ijtimoiy tarmoqlarda tarqalayotgan havo juda sovib ketarkan, degan gaplar noto‘g‘ri.

“Chunki shimoliy va janubiy hududlar orasida katta tafovutlar mavjud. Harorat -20 darajaga tushib ketarkan, degan gaplar faqatgina O‘zbekistonning shimoli-g‘arbiy hududlari, yaʼni Qoraqalpog‘iston, Navoiy viloyatining shimoliy hududlarida kuzatilishi mumkin. Sovuq havo massasi O‘zbekistonga deyarli to‘liq kirib kelib bo‘lgan”, — dedi mutaxassis.

Humoyun Mag‘ripovning taʼkidlashicha, ayni paytdagi sovuq harorat anomal darajada emas.

“Anomal sovuqning o‘z taʼrifi bor. Bu o‘rtacha kunlik haroratdan 7 daraja past harorat kuzatilsa va bu holat ketma-ket 5 kun davom etsa, anomal sovuq deb ataladi. Hozir esa hech qanday vahimaga o‘rin yo‘q. Bu anomal sovuq emas, oddiy qish fasli”, — dedi u.

Avvalroq dekabr oyi iliq bo‘lishi va qish iliq kelishi deganda qanday ob-havo tushunilishi aytilgandi. Shu bilan birga, O‘zbekistonda oxirgi 50 yildagi eng sovuq dekabr oyi haqida maʼlumot berilgan.