Navoiy viloyati Xatirchi tumanida qum-shag‘al noqonuniy qazib olinishi natijasida tabiatga 606 million so‘mdan ortiq zarar yetkazildi. Bu haqda Ekologiya vazirligi axborot xizmati xabar berdi.
Xabarga ko‘ra, Ekologiya, atrof-muhitni muhofaza qilish va iqlim o‘zgarishi vazirligi va vazirlikning Navoiy viloyati boshqarmasi davlat inspektorlari tomonidan navbatdagi nazorat tadbiri o‘tkazildi. Xatirchi tumanidan oqib o‘tuvchi Ko‘ksaroy soyi hududida olib borilgan tadbir davomida soyning muhofaza mintaqasida 1 dona ekskavator va 1 dona Shacman rusumli yuk tashuvchi transport vositalari yordamida qum-shag‘al mahsulotlari qazib olinib, tashib olib ketilayotganligi aniqlandi.
Holat yuzasidan qum-shag‘al mahsulotlari qazilgan joyda o‘lchov ishlari olib borildi. Natijada tabiatga 606 million 095 ming 78 so‘m zarar yetkazilgani ma’lum bo‘ldi. “Tabiatni muhofaza qilish to‘g‘risida”gi qonun 18-moddasi hamda “Yerosti boyliklari to‘g‘risida”gi qonun 18-moddasi talablari buzilgan.
Holatga huquqiy baho berish, aybdorlarga nisbatan qonuniy chora ko‘rish va tabiatga yetkazilgan zararni undirish maqsadida to‘plangan hujjatlar tuman prokuraturasiga yuborildi.
Izoh (0)