Iqtisodiyot va moliya vazirligi Toshkent shahrida joylashgan “Qo‘yliq” va “Chorsu” dehqon bozorlaridagi qishloq xo‘jaligi mahsulotlarining 11-dekabrdagi ulgurji narxlari haqida maʼlumot berdi.
.jpg)
O‘rganishlarga ko‘ra, dushanba tongida “Qo‘yliq”da narxi sezilarli darajada ko‘tarilgan mahsulotlardan biri bodring bo‘lgan. O‘tgan hafta avvalida bodring kilosi maksimum 18 000 so‘mgacha sotilgan bo‘lsa, joriy hafta boshida 27 000 so‘mgacha oshdi.
Uzumning eng yuqori ulgurji narxi (bir kilo uchun) 100 000 so‘mdan 90 000 so‘mga arzonlashdi.
Vazirlik axborotiga qaraganda, “Chorsu”da mol go‘shtining kilosi 60 000 – 70 000 so‘mdan, qo‘y go‘shti 65 000 – 70 000 so‘mdan sotilmoqda. Go‘sht ulgurji narxlari ikki oy davomida o‘zgarmay kelmoqda.
“Qo‘yliq” bozorida lazer guruchining kilosini 18 000 – 25 000 so‘mdan, no‘xatni 18 000 – 20 000 so‘mdan, qizil loviyani 14 000 – 17 000 so‘m, moshni 10 000 – 12 000 so‘mdan xarid qilish mumkin.
Mazkur bozorda kartoshkaning kilosi 1 700 – 4 000 so‘m, piyozniki 1 200 – 2 200 so‘m, sabziniki esa 1 000 – 2 500 so‘m. Bulg‘or qalampirining kilosi 2 000 – 18 000 so‘mdan, sarimsoq piyoz 12 000 – 25 000 so‘mdan sotilmoqda.
Pomidorning minimum narxi o‘tgan haftadagi 10 000 so‘mdan 15 000 so‘mga o‘sgan. Maksimum narx esa o‘zgarmagan – kilosi 22 000 so‘mdan.
Mevalardan bananning kilosini maksimum 23 000 so‘mdan 21 000 so‘mga arzonlagan.
Anorni yuqori narx 35 000 so‘mgacha, limonni 27 000 so‘m, behini 25 000 so‘mgacha xarid qilish mumkin.
Vazirlik “Qo‘yliq” bozorida 28 turdagi meva, sabzavot, dukkakli va guruch mahsulotlari narxlari bo‘yicha maʼlumotlar ertalab soat 5:00 dan 7:00 ga qadar o‘rganilganini qayd etgan. “Chorsu” bozorida mol va qo‘y go‘shti narxlari bo‘yicha maʼlumotlar ertalab soat 5:00 va 8:00 oralig‘ida yig‘ilgani eslatilgan.
Izoh (0)