Namangan viloyat prokuraturasining Ekologiya, atrof-muhitni muhofaza qilish va o‘rmon xo‘jaligi sohasidagi qonunchilik ijrosi ustidan nazorat bo‘limi tomonidan Pop va Yangi Namangan tumanlarida qum-shag‘al qazib olish holatlarini qonuniyligi yuzasidan olib borilgan o‘rganishda bir qator qonunbuzilish holatlari aniqlandi. Bu haqda viloyat prokuraturasi matbuot xizmati xabar berdi.
Ma’lum qilinishicha, Pop tumanidagi “J.M.” fermer xo‘jaligi mansabdorlari tomonidan 50 417 84 metr kub foydali qazilmalar (qum) noqonuniy qazib olinib, davlat va jamiyat manfaatlariga 3,025 milliard so‘m zarar yetkazilgan.
Shu kabi, Yangi Namangan tumanidagi “B.X.” MCHJ rahbari A.A.ning topshirig‘iga ko‘ra, jamiyat ishchilari tomonidan 32 694 metr kub foydali qazilmalar (tuproq) noqonuniy qazib olinib, davlat va jamiyat manfaatlariga 122,6 million so‘m zarar yetkazilgan.
O‘rganish yakuniga ko‘ra, mazkur holatlar yuzasidan Jinoyat kodeksining 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiisteʼmol qilish) va 229-moddasi (o‘zboshimchalik) bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Avvalroq Surxondaryoda xonadoniga mayning kripto-aktivlari qurilmalarini o‘rnatganlar aniqlangani, Surxondaryoda ichimlik suvi tarmog‘iga o‘zboshimchalik bilan ulangan fermer xo‘jaliklari 1,2 mlrd so‘m zarar yetkazilgani, O‘zbekistonning bir qancha hududida gaz ta’minoti xodimlari tabiiy resurslardan noqonuniy foydalangani aniqlangani to‘g‘risida xabar berilgandi.
Izoh (0)