Top-5 ligalarda 700 ta gol urgan yagona futbolchi, “sevimli” raqib — “Sevilya”. Lionel Messining klub miqyosidagi gollari haqida

“PSJ” hujumchisi Lionel Messi “Marsel”ga qarshi uchrashuvda nafaqat barcha gollarda ishtirok etdi (1+2), balki klublar miqyosida 700-goliga ham mualliflik qildi. Quyida argentinalik hujumchining gollariga batafsil to‘xtab o‘tiladi. 

Leo hatto qo‘li bilan ham gol urgan

Messi 700 ta gol urish uchun 840 ta o‘yin o‘tkazgan. Biroq argentinalik har doim ham o‘yinlarda to‘liq qatnashmagan — shundan kelib chiqilsa, uning hisobida har 98,4 daqiqada bitta gol mavjud.

Leo tanasining noodatiy qismlari bilan ham gol urgan: ko‘kragi bilan — 2009-yilgi klublar o‘rtasidagi JCHda “Estudiantes” darvozasiga; qo‘li bilan — La Liga 2007/08-yilgi mavsumida “Espanyol”ga; soni bilan — Ispaniya Kubogi 2013/14-yilgi mavsumida “Xetafe” darvozasiga.

Leo faoliyati davomida 48 marta bir o‘yinda uch va undan ortiq gol urgan, jumladan, 6 ta o‘yinda poker qayd etgan va bitta o‘yinda (2011/12-yilgi mavsum YCHLda “Bayer” darvozasiga) penta-trik qayd etgan. 

Lionel hisobida “mukammal het-trik” (chap, o‘ng, bosh) bo‘lmagan, lekin o‘ng oyog‘i bilan uch marta “APOEL” darvozasini (Chempionlar Ligasi 2014/15-yilgi mavsum) ishg‘ol etgan.  

Messi 2009/10-yilgi mavsumdan 2018/19-yilgi mavsumga qadar ketma-ket 10 mavsum 40+ gol urishga muvaffaq bo‘lgan. 

Maydonning qaysi qismlaridan gol urgan?

Leo 110 ta penaltidan 84 tasini aniq amalga oshirgan.

Argentinalikning faoliyatida faqat standartlardan urilgan het-trik ham mavjud: 2019-yilda “Selta”ga qarshi o‘yinda penalti + 2 ta jarima zarbasidan gol.

Lionel Messi 672 ta golni “Barselona” safida (778 ta o‘yin) va 28 ta golni “PSJ” safida (62 ta o‘yin) urgan.

Qaysi musobaqalarda urgan?

Leo top-5 ligalarda 700 ta gol urgan yagona futbolchi. Ronaldu Yevropada 701 marta raqiblar darvozasini ishg‘ol etgan, lekin ulardan 5 tasi “Sporting” hisobiga to‘g‘ri kelmoqda.

Messi La Liga tarixidagi eng yaxshi to‘purar (474 ta gol) va shu bilan birga eng yaxshi assistent ham (192) hisoblanadi. 2011/12-yilgi mavsum chempionatda 50 ta gol urishga muvaffaq bo‘lgan. 

Shuningdek, u Ispaniya chempionatida het-trik qayd etish bo‘yicha rekordchi (36) — shulardan 8 tasi 2011/12-yilgi mavsumga to‘g‘ri keladi.

Messi — “El-Klasiko”lar tarixidagi eng yaxshi to‘purar (26). Undan keyingi o‘rinda Ronaldu va Alfredo di Stefano joy olgan. Madrid jamoasining sobiq hujumchilari hisobida 18 tadan gol mavjud. 

Leo hozir sharafini himoya qilayotgan klubiga qarshi 10 ta o‘yinda 6+1 statistika qayd etgan. Lekin hech qachon bir o‘yinda bittadan ortiq gol urmagan.