O‘zbekistonda 40-50 yillik avtomashinalarni bosqichma-bosqich iste’moldan chiqarish taklif etildi. Bu haqda “Milliy tiklanish” demokratik partiyasi fraksiyasi rahbari Alisher Qodirov ma’lum qildi.
Uning bildirishicha, 9-iyul kuni ochiq va tahliliy ruhda o‘tgan yig‘ilishda davlat rahbari bilan bir qator tavsiya va tashabbuslar muhokama qilindi.
“40-50 yillik avtomashinalarni bosqichma-bosqich iste’moldan chiqarish — juda to‘g‘ri taklif. Hatto bu cheklovni 25-30 yilga tushirish ham noto‘g‘ri bo‘lmaydi, deb o‘ylayman. Faqat mashinani almashtirish uchun qulay takliflar bo‘lishi kerak”, deb yozdi deputat.
Videoselektor yig‘ilishida vazirlik va hokimlik binolari oldiga mashinasini “parkovka” qilgan xodimlar jazolanishi ma’lum qilingandi. Alisher Qodirov davlat xizmat avtolariga alohida e’tiborni taqiqlashni ma’qullab, tartib hammaga bir bo‘lish kerakligini aytdi.
Yig‘ilishda “Surunkali qoidabuzarlar” dasturi ishga tushirilishi, qarama-qarshi harakatlanish, chiroqning qizil rangida o‘tish bir oy ichida 2 marta sodir etilsa yoki tezlik 5 marta oshirilsa 1 yilgacha jarimadan chegirma berilmasligi ham ma’lum qilingandi. Alisher Qodirovning fikricha, tezlik uchun cheklov joy, vaqt va zaruratiga qarab belgilanishi kerak.
“Masalan, magistral yo‘l, masofa uzoq, aholi yashash punkti emas, nega 130 yurish mumkinmas? Qizilda o‘tish, cheklangan joyda ikki karra tez yurish, avariya xavfi yaratib qasddan tartibsiz harakat… marhamat, ayovsiz jarimani bosish kerak, lekin ayrim jazolar bo‘yicha haydovchilarning ham fikri bilan qiziqish zarur”, deydi deputat.
U Ichki ishlar tizimi xodimlarini tayyorlash bo‘yicha tashabbusni o‘rinli va og‘riqli muammo deb atadi.
“Bu sohada ishini yaxshi biladigan, o‘qigan, har tomonlama jamiyatga namuna bo‘ladigan qorako‘zlar ishlashi kerak, vazirlikdagi mansabdorning jiyan yoki hamqishloqlari emas. Jamiyat formadagi xodimlar bilan faxrlanishi kerak”, deydi “Milliy tiklanish” rahbari.
Alisher Qodirovning ma’lum qilishicha, endilikda qonunlarni o‘zgartirish bo‘yicha maslahatlashuvlar boshlanadi.
2030-yilga qadar Toshkent va Nukus shaharlari, viloyatlar markazlarida “Yevro – 5” va undan yuqori standartlariga muvofiq bo‘lmagan avtomashinalar ekspluatatsiyasi bosqichma-bosqich cheklash ham ko‘zda tutilgan.
Izoh (0)