Blinken “Vagner” faoliyati BMTning Afrikadagi missiyasiga xalaqit berayotganini aytdi

“Vagner” xususiy harbiy kompaniyasining Afrikada faoliyat yuritayotgan bo‘linmalari BMT tinchlikparvar kuchlari ishiga xalaqit bermoqda. Bu haqda AQSH Davlat kotibi Entoni Blinken Vashingtonda bo‘lib o‘tgan AQSH-Afrika sammiti yakunlari bo‘yicha matbuot anjumanida aytib o‘tdi.

Blinkendan kompaniyaning Afrikadagi faoliyatiga izoh berish so‘raldi. Bunga javoban Davlat kotibi AQSH Davlat departamenti guruhning Markaziy Afrika respublikasidagi faoliyatini tekshirayotganini aytdi.

Blinken ilgari Markaziy Afrika respublikasi, Mozambik, Mali va Liviya kabi davlatlarda “Vagner” kuchlari bilan bog‘liq holda yuzaga kelgan xavotirlarni esga oldi va guruh jangarilari qit’adagi inson huquqlari buzilishiga javobgar ekanini ta’kidladi.

“Vagner’ tomonidan foydalanilayotgan resurslar hujjatlashtirilgan. Biz ‘Vagner’ning BMT tinchlikparvar operatsiyalariga xalal berib, tinchlikparvar kuchlarni xavf ostiga qo‘yganini, BMT xodimlarini xavf ostiga qo‘yganini ko‘rdik. Bunday yomon ishlarning ro‘yxati uzun”, — dedi Davlat kotibi.

“Vagner” o‘zi qanday guruh?

“Vagner” guruhi birinchi marta Ukrainada 2014-yilda paydo bo‘lgan va Rossiyaning Qrimni egallab olishida muhim rol o‘ynagan edi. Unga maxsus topshiriqli bo‘linma sobiq jangchisi Dmitriy Valeryevich Utkin asos solgan deb hisoblanadi, u guruhga Gitlerning sevimli kompozitori Richard Vagnerning nomini bergan.

Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.

Avvalroq Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel “Vagner” Markaziy Afrika respublikasidagi inson huquqlari buzilishiga javobgar ekanini muhim xavfsizlik masalalarini nazorat qilishini ta’kidlagan va buni Malidagi vaziyat kontekstida eslatgan edi. Malida yil davomida ikkita harbiy to‘ntarish sodir bo‘ldi.

Yevropa Ittifoqi Tashqi ishlar kengashi “Vagner’ guruhi Ukraina, Suriya, Liviya, Markaziy Afrika respublikasi, Sudan va Mozambikdagi jiddiy inson huquqlari buzilishi, jumladan qiynoqlar va suddan tashqari, ommaviy yoki o‘zboshimchalik bilan qatl qilish va qotillik uchun javobgar ekanligini ta’kidlaydi. Kengash guruhning o‘ziga va unga aloqador shaxslarga nisbatan sanksiyalar kiritigan.