“Bir yilda 5 nafar jahon va 5 nafar mamlakat chempioni yetishib chiqdi” — Mirishkor tumani hokimi

Qashqadaryo viloyatining Mirishkor tumanida yoshlar sportiga qaratilgan e’tibor sabab 5 nafar jahon va 5 nafar mamlakat chempioni yetishib chiqqan. Bu haqda tuman hokimi Sherali Sanayev faollar va yoshlar bilan muloqotida ma’lum qildi.

Tuman hokimligi axborot xizmatining “Daryo”ga ma’lumot berishicha, Sherali Sanayev faollar bilan uchrashuvda yoshlar orasida xalqaro, Osiyo va mamlakat miqyosidagi sport musobaqalarida erishilgan yutuqlar haqida gapirgan.

Joriy yil 47 nafar mirishkorlik sportchi mamlakat, Osiyo va jahon musobaqalarida faxrli o‘rinlarni qo‘lga kiritgan. Jumladan, besh nafar yosh jahon chempioni, ikki nafari xalqaro musobaqalar g‘olibi, uch nafari Osiyo chempioni bo‘lgan. Osiyo musobaqalarida ham ikki nafar yosh 2-o‘rinni va ikki nafari 3-o‘rinni egallagan, — dedi Sherali Sanayev.

Qo‘shimcha qilinishicha, tumanda besh nafar sportchi mamlakat chempioni bo‘lgan. Shuningdek, 16 nafari O‘zbekiston chempionatlarida faxrli o‘rinni olgan bo‘lsa, ikki nafari O‘zbekiston Kubogi sohibi bo‘lgan.

Tumanimizda Muxtorali Murtozayev, Nodir Samandarov, Sherbek Azamatov, Sarvar Ro‘ziyev va Shohrux Mamedov kabi Jahon chempionlari yetishib chiqqani, rahbar sifatida meni faxrlantiradi. Ular bizning qahramonlarimiz. Bugunimiz, ertamiz. Islohotlar nafaqat iqtisodiyotga, balki, ta’lim va sport yo‘nalishida ham yoshlarimizga darvozalarni keng ochdi. Iqtidorlarni qo‘llab-quvvatlash va ular ro‘yobga chiqarishda amaldagi siyosat muhim omil bo‘lmoqda. Natijada, mirishkorlik yoshlar ham jahon sahnalarida Yurt bayrog‘ini yuqori ko‘tarmoqda, — dedi tuman rahbari.