Termizda Afg‘oniston iqtisodiyotiga mutaxassislar tayyorlash uchun ta’lim klasteri tashkil etiladi
Termizda Afg‘oniston iqtisodiyoti uchun mutaxassislar tayyorlash maqsadid ta’lim klasteri tashkil etiladi. Bu haqda TIV matbuot xizmati xabar berdi.
Ma’lum qilinishicha, 1-dekabr kuni Polshaning Lodz shahrida Yevropada xavfsizlik va hamkorlik tashkiloti (YXHT) Tashqi ishlar vazirlari kengashining 29-yig‘ilishi o‘tkazilgan. Unda so‘zga chiqqan TIV rahbari Vladimir Norov Afg‘oniston masalasiga ham to‘xtalib o‘tgan.
Vazir YXHT hamkorlarini uzoq qiyin vaziyatdagi afg‘on xalqiga gumanitar yordam ko‘rsatish uchun Termiz shahridagi Xalqaro transport va logistika xabidan foydalanishga, shuningdek, Afg‘oniston iqtisodiyoti uchun mutaxassislar tayyorlash uchun Termiz shahrida ta’lim klasterini tashkil etishni qo‘llab-quvvatlashga taklif qilgan.
Vladimir Norov o‘z nutqida Markaziy Osiyo mintaqasining barqaror rivojlanishi va xavfsizligi istiqbollari qo‘shni Afg‘onistonda tinchlikni ta’minlash bilan uzviy bog‘liqligini ta’kidlagan.
“Xalqaro hamjamiyatning ustuvor vazifalari Afg‘onistondagi insoniy halokatining oldini olish, mamlakat iqtisodiyotini tiklash va mintaqaviy savdo-iqtisodiy aloqalarga integratsiya qilish, bu mamlakatda muhim infratuzilma va ijtimoiy loyihalarni amalga oshirishdan iborat bo‘lishi kerak”, — degan u.
TIV rahbarining so‘zlariga ko‘ra, strategik muhim loyiha Termiz—Mozori Sharif—Kobul—Peshovar temiryo‘l loyihasini amalga oshirilishi Markaziy va Janubiy Osiyo o‘rtasidagi o‘zaro bog‘liqlikni mustahkamlash, Afg‘onistonni iqtisodiy hamkorlikka jalb etish va uni bu ikki mintaqani bog‘laydigan ko‘prikka aylantirish uchun katta imkoniyatlar ochadi.
O‘zbekiston prezidentining BMT shafeligida xalqaro muzokaralar guruhini tuzish tashabbusini amalga oshirish Afg‘oniston hukumati tomonidan o‘z majburiyatlarini bosqichma-bosqich bajarish algoritmini ishlab chiqish va kelishish uchun muhim platforma yaratadi.
