Термизда Афғонистон иқтисодиёти учун мутахассислар тайёрлаш мақсадид таълим кластери ташкил этилади. Бу ҳақда ТИВ матбуот хизмати хабар берди.
Маълум қилинишича, 1 декабрь куни Польшанинг Лодз шаҳрида Европада хавфсизлик ва ҳамкорлик ташкилоти (ЕХҲТ) Ташқи ишлар вазирлари кенгашининг 29-йиғилиши ўтказилган. Унда сўзга чиққан ТИВ раҳбари Владимир Норов Афғонистон масаласига ҳам тўхталиб ўтган.
Вазир ЕХҲТ ҳамкорларини узоқ қийин вазиятдаги афғон халқига гуманитар ёрдам кўрсатиш учун Термиз шаҳридаги Халқаро транспорт ва логистика хабидан фойдаланишга, шунингдек, Афғонистон иқтисодиёти учун мутахассислар тайёрлаш учун Термиз шаҳрида таълим кластерини ташкил этишни қўллаб-қувватлашга таклиф қилган.
Владимир Норов ўз нутқида Марказий Осиё минтақасининг барқарор ривожланиши ва хавфсизлиги истиқболлари қўшни Афғонистонда тинчликни таъминлаш билан узвий боғлиқлигини таъкидлаган.
«Халқаро ҳамжамиятнинг устувор вазифалари Афғонистондаги инсоний ҳалокатининг олдини олиш, мамлакат иқтисодиётини тиклаш ва минтақавий савдо-иқтисодий алоқаларга интеграция қилиш, бу мамлакатда муҳим инфратузилма ва ижтимоий лойиҳаларни амалга оширишдан иборат бўлиши керак», — деган у.
ТИВ раҳбарининг сўзларига кўра, стратегик муҳим лойиҳа Термиз—Мозори Шариф—Кобул—Пешовар темир йўл лойиҳасини амалга оширилиши Марказий ва Жанубий Осиё ўртасидаги ўзаро боғлиқликни мустаҳкамлаш, Афғонистонни иқтисодий ҳамкорликка жалб этиш ва уни бу икки минтақани боғлайдиган кўприкка айлантириш учун катта имкониятлар очади.
Ўзбекистон президентининг БМТ шафелигида халқаро музокаралар гуруҳини тузиш ташаббусини амалга ошириш Афғонистон ҳукумати томонидан ўз мажбуриятларини босқичма-босқич бажариш алгоритмини ишлаб чиқиш ва келишиш учун муҳим платформа яратади.
Изоҳ (0)