Surxondaryoda yo‘l talashish ortidan 8 kishi mushtlashdi (video)
Ijtimoiy tarmoqlarda “Denovda ikki kishi ayovsiz kaltaklandi” sarlavhasi ostida videoxabar tarqaldi. Holat yuzasidan Surxondaryo viloyati ichki ishlar boshqarmasi axborot xizmati munosabat bildirdi.
Aniqlanishicha, 11-noyabr kuni soat 12:30 da Denov shahri “Jomiy” mahallasi hududidan o‘tuvchi avtomobil yo‘li bo‘yida mazkur mahallada yashovchi fuqaro U.A. boshqaruvidagi Damas avtomashinasida harakatlanib ketayotgan bo‘lgan. Ichki yo‘ldan avtomobil yo‘liga harakatlanib chiqqan vaqtida “VAZ” furgon avtomashinasi bilan yo‘l talashib, yo‘l chetiga to‘xtab, avtomashinadan tushib, haydovchi o‘rindig‘ida bo‘lgan, voyaga yetmagan M.E. va old yo‘lovchi o‘rindig‘ida bo‘lgan fuqaro S.B. bilan o‘zaro tortishib qolgan, biroz janjallashib, shundan so‘ng ketgan.
Oradan 3 soat o‘tib — taxminan 14:30 chamasida M.E. va S.B. o‘zlarining tanishlari — A.B., M.Sh., A.A., Sh.B. bilan birgalikda Denov tumani “Jomiy” mahallasida joylashgan “Baraka” nomli savdo do‘koni yonida U.A. va U.R. bilan janjallashib, bir-birlariga tan jarohati yetkazib, bezorilik jinoyatini sodir etgan.
Ushbu holat yuzasidan tuman IIB huzuridagi tergov bo‘limi tomonidan 19-noyabr kunida fuqaro M.E., S.B., A.B., M.Sh., A.A., Sh.B., U.R., U.A.ga nisbatan Jinoyat kodeksining 277-moddasi (bezorilik) 2-qismi “b” bilan jinoyat ishi qo‘zg‘atilgan.
Mazkur holat Surxondaryo viloyati IIB tomonidan nazoratga olingan bo‘lib, aybdorlarga nisbatan qonunda belgilangan tartibda chora ko‘rilishi bildirilgan.
Mavzuga doir:
- Miroboddagi maktab o‘quvchilarining mushtlashuvi yuzasidan jinoyat ishi qo‘zg‘atildi
- Namanganda bir guruh maktab o‘quvchilari mashhurlikka erishish uchun mushtlashdi (video)
- Qashqadaryoda bir guruh fuqarolar mushtlashdi (video)
