Makron: “AQSHdagi yangi qonun tufayli G‘arb parchalanib ketishi mumkin”

Amerikaning mahalliy kompaniyalarga subsidiyalar taqdim etishni ko‘zda tutuvchi, inflyatsiya va iqlim haqidagi yangi qonuni (The Inflation Reduction Act, IRA) G‘arb mamlakatlari orasidagi munosabatlarga salbiy ta’sir o‘tkazadi, dedu Fransiya prezidenti Emmanuel Makron respublikaning AQSHdagi elchixonasida nutq so‘zlar ekan. Bu haqda Financial Times xabar bermoqda.

“So‘nggi bir necha oylardagi chora-tadbirlar, xususan IRA — G‘arbni parchalaydigan choralardir… Biz o‘zimizning siyosiy dasturlarimizni muvofiqlashtirishimiz va qaytadan sinxronlashtirishimiz zarur”, — dedi u.

Keyinroq, kongress kutubxonasida chiqish qilib, Makron ushbu qonunni Fransiya biznesiga nisbatan “o‘ta agressiv” deb atadi va u “ko‘plab ish o‘rinlarini o‘ldirayotgani”ni aytdi. Fransiya prezidenti ta’kidlaganidek: “Balki siz o‘z muammongizni hal qilayotgandirsiz, lekin bu bilan bizning muammolarimizni chuqurlashtiryapsiz”. U IRA’ni muhokama qilish paytida unga AQSHdan “hech kim qo‘ng‘iroq qilmagani”ni aytib, o‘zlarini “uning o‘rniga qo‘yib ko‘rishlari”ni taklif qildi.

Yuqorida tilgan olingan qonun AQSHda avgust oyida kuchga kirdi. U AQSHda mahsulot ishlab chiqaruvchi va qayta tiklanuvchi energiya manbalari sohasida ishlovchi kompaniyalarga milliardlab imtiyozlar berilishini ko‘zda tutadi. Bu Yevropada ba’zi choralarning sanoatga ta’siri yuzasidan, shu jumladan, investitsiyalarni o‘ziga og‘dirib olishi xavfi bo‘yicha xavotir uyg‘otdi.

Avvalroq AFP o‘z manbalariga tayanib, ishlab chiqarish quvvatlarining Yevropadan AQSHga ko‘chirilishi Fransiya hukumatini eng ko‘p xavotirga solayotganini yozgandi.

Germaniya hukumati esa “Transatlantika savdo urushi” boshlanishidan, uni Makron yuzaga keltirishi xavfidan tashvishlanmoqda.

Yevrokomissiya Yevroittifoq mamlakatlarini IRA masalasida hamjihatlikka chaqirib, AQSH o‘z xatti-harakatlarida shoshqaloqlik qilmayotganini, tomonlar aniq yechimlar izlayotganini ta’kidlagan. Manbalarga ko‘ra, Yevrokomissiya sanoatning asosiy tarmoqlarini qo‘llab-quvvatlash uchun suveren fond hozirlamoqda, u zayom mablag‘lari hisobidan moliyalashtiradi. Shu bilan birga, Yevrokomissiya global subsidiyalar poygasi zarar keltirishi mumkin, deb hisoblaydi.