Bahodir Jalolov 27-noyabr tongida prof boksdagi navbatdagi jangini o‘tkazadi

Professional boksning super og‘ir vazn toifasida harakat qilayotgan Bahodir Jalolov (11-0, 11 KO) o‘zining navbatdagi jangini O‘zbekiston vaqti bilan 27-noyabr tongida o‘tkazadi.

Kaliforniyada (AQSH) bo‘lib o‘tgan jang oqshomida O‘zbekiston vakiliga amerikalik Kyortis Harper (14-8, 9 KO) raqib bo‘ladi.

Boks oqshomi O‘zbekiston vaqti bilan 07:00 da boshlanadi. Jalolov ishtirokidagi jang uchinchi bo‘lib o‘tkaziladi va taxminan 08:00 atrofida boshlanadi. Jang O‘zbekiston telekanallari orqali efirga uzatilmaydi.

Kechaning asosiy jangi birinchi yarim o‘rta vazn toifasida vakant turgan WBC chempionlik kamari uchun Rejis Progreys va Xose Sepeda o‘rtasida bo‘lib o‘tadi.

Jalolov so‘nggi jangini iyun oyida o‘tkazib, unda belgiyalik Jek Mulovayini muddatidan avval mag‘lub etgandi. Kyortis Harper esa oxirgi marta iyul oyida ringga chiqib, Kristian Tun ustidan g‘alabaga erishgan.